दिव्यांग आणि ज्येष्ठ नागरिकांच्या मदतीला अमरावती मनपा; एकाच शिबिरात ४९१ लाभार्थ्यांची नोंदणी!

वयोश्री योजनेत २३८ ज्येष्ठ नागरिक, तर ADIP योजनेत २५३ दिव्यांगांची नोंदणी; महापौर श्रीचंद तेजवानी व खासदार डॉ. अनिल बोंडे यांचा पुढाकार

अमरावती : दिव्यांग बांधव आणि ज्येष्ठ नागरिकांना स्वावलंबी जीवन जगता यावे, तसेच शासनाच्या विविध कल्याणकारी योजनांचा लाभ त्यांच्यापर्यंत पोहोचावा, या उद्देशाने अमरावती महानगरपालिकेने सामाजिक बांधिलकी जपत विशेष नोंदणी शिबिराचे आयोजन केले. महानगरपालिका आणि भारतीय कृत्रिम अवयव निर्माण महामंडळ (ALIMCO), कानपूर यांच्या संयुक्त विद्यमाने रुक्मिणीनगर येथील मनपाच्या उच्च प्राथमिक शाळा क्रमांक १९ मध्ये मंगळवारी, ३ नोव्हेंबर रोजी हे शिबिर पार पडले. या शिबिराला उत्स्फूर्त प्रतिसाद मिळाला असून, एकाच दिवसात तब्बल ४९१ लाभार्थ्यांची नोंदणी करण्यात आली.

महापौर श्रीचंद तेजवानी आणि खासदार डॉ. अनिल बोंडे यांच्या पुढाकारातून या उपक्रमाचे आयोजन करण्यात आले होते. सकाळी ९ ते सायंकाळी ५ वाजेपर्यंत चाललेल्या या शिबिरात ज्येष्ठ नागरिकांसाठीच्या वयोश्री योजनेअंतर्गत २३८ ज्येष्ठ नागरिकांनी, तर दिव्यांग व्यक्तींसाठीच्या ADIP योजनेअंतर्गत २५३ लाभार्थ्यांनी नोंदणी केली. या माध्यमातून गरजू नागरिकांना आवश्यक कृत्रिम अवयव, सहाय्यभूत साधने आणि उपकरणे मिळवून देण्याच्या प्रक्रियेला सुरुवात झाली आहे.

४९१ लाभार्थ्यांना शासकीय योजनांशी जोडण्याचा प्रयत्न

वाढत्या वयामुळे ज्येष्ठ नागरिकांना आणि विविध प्रकारच्या दिव्यांगत्वामुळे दिव्यांग व्यक्तींना दैनंदिन जीवनात अनेक अडचणींचा सामना करावा लागतो. चालण्यासाठी आधार, श्रवणयंत्र, व्हीलचेअर यांसारख्या सहाय्यभूत उपकरणांची गरज अनेकांना असते. मात्र, आर्थिक परिस्थितीमुळे अशी साधने मिळविणे शक्य होत नाही. ही गरज लक्षात घेऊन महानगरपालिका प्रशासनाने ALIMCO च्या सहकार्याने नोंदणी शिबिर आयोजित केले. शिबिरात लाभार्थ्यांची नोंदणी करण्यासोबतच योजनांमधून मिळणाऱ्या सुविधांची माहितीही देण्यात आली.

खासदारांसह मनपा पदाधिकाऱ्यांची भेट

या शिबिराला खासदार डॉ. अनिल बोंडे, खासदार बलवंत वानखडे, मनपा आयुक्त डॉ. मंगेश गोंदावले, उपमहापौर सचिन भेंडे, स्थायी समिती सभापती अविनाश मार्डीकर, सभागृह नेते चेतन गावंडे, गटनेते नाना आमले, विधी समिती सभापती स्नेहा लुल्ला आणि शिक्षण समिती सभापती ॲड. प्रीती रेवणे यांनी सदिच्छा भेट दिली.

यावेळी मान्यवरांनी नोंदणी प्रक्रियेची पाहणी करून संबंधित अधिकाऱ्यांकडून दोन्ही योजनांबाबत माहिती जाणून घेतली. तसेच शिबिरात सहभागी झालेल्या दिव्यांग बांधवांशी आणि ज्येष्ठ नागरिकांशी संवाद साधून त्यांच्या अडचणी व अपेक्षा जाणून घेतल्या. अशा उपक्रमांमुळे गरजू नागरिकांना शासकीय योजनांचा लाभ मिळविण्यासाठी मोठी मदत होत असल्याचे त्यांनी नमूद केले.

साहित्य वितरणाची जबाबदारी मनपा उचलणार

शिबिराला मिळालेल्या प्रतिसादाबद्दल समाधान व्यक्त करताना महापौर श्रीचंद तेजवानी यांनी सांगितले की, दिव्यांग बांधव आणि ज्येष्ठ नागरिकांना आवश्यक सहाय्यभूत उपकरणे व साहित्य उपलब्ध करून देण्यासाठी महानगरपालिका कटिबद्ध आहे. नोंदणी पूर्ण झाल्यानंतर पात्र लाभार्थ्यांच्या गरजेनुसार आवश्यक उपकरणांचे मोजमाप घेण्याची तसेच संबंधित साहित्याचे वितरण करण्याची व्यवस्था महानगरपालिका स्तरावर करण्यात येणार आहे. लाभार्थ्यांना प्रत्यक्ष साहित्य मिळेपर्यंत पुढील प्रक्रिया पूर्ण करण्यासाठी मनपा प्रशासन प्रयत्नशील राहील. दिव्यांग आणि ज्येष्ठ नागरिकांना स्वावलंबी व सन्मानपूर्वक जीवन जगता यावे, यासाठी अशा उपक्रमांना भविष्यातही प्राधान्य दिले जाईल.

अधिकारी-कर्मचाऱ्यांचे विशेष परिश्रम

या उपक्रमाला अतिरिक्त आयुक्त महेश देशमुख, उपायुक्त योगेश पिठे, समाज विकास अधिकारी धनंजय शिंदे, शिक्षणाधिकारी डॉ. प्रकाश मेश्राम, मुख्याध्यापक, शिक्षकवृंद तसेच महानगरपालिकेच्या विविध विभागांतील अधिकारी व कर्मचारी उपस्थित होते.

शिबिराच्या यशस्वितेसाठी समाज विकास अधिकारी धनंजय शिंदे, शिक्षणाधिकारी डॉ. प्रकाश मेश्राम, समाज विकास विभाग आणि शिक्षण विभागातील कर्मचाऱ्यांनी विशेष परिश्रम घेतले.

दिव्यांग आणि ज्येष्ठ नागरिकांना केवळ योजनांची माहिती न देता त्यांना प्रत्यक्ष लाभ मिळवून देण्याच्या दिशेने अमरावती महानगरपालिकेने उचललेले हे पाऊल महत्त्वपूर्ण ठरत आहे. एका दिवसात ४९१ लाभार्थ्यांची नोंदणी झाल्याने या सामाजिक उपक्रमाला मिळालेला प्रतिसाद विशेष उल्लेखनीय आहे.