खासदार नवनीत राणा यांच्याकडून पाचही गोडाऊनमधील साहित्याची पाहणी; ५०० हून अधिक मजूर पॅकिंगच्या कामात व्यस्त, लाडक्या बहिणींना किराणा किटसोबत साडीची भेट
अमरावती : सर्वसामान्य, गोरगरीब आणि गरजू कुटुंबांची दिवाळी आनंदात साजरी व्हावी, या उद्देशाने आमदार रवि राणा आणि भाजपा नेत्या माजी खासदार नवनीत राणा यांच्या संकल्पनेतून यंदाही दिवाळीनिमित्त भव्य किराणा वाटप उपक्रम राबविण्यात येत आहे. या उपक्रमांतर्गत गरजू कुटुंबांना किराणा साहित्याचे वाटप करण्यात येणार असून, त्यासाठी अमरावती शहरातील पाच वेगवेगळ्या ठिकाणी असलेल्या गोडाऊनमध्ये किराणा किट तयार करण्याचे काम युद्धपातळीवर सुरू आहे.
या पॅकिंग प्रक्रियेत कोणतीही त्रुटी राहू नये आणि प्रत्येक गरजू कुटुंबापर्यंत साहित्य व्यवस्थित पोहोचावे, यासाठी भाजपा नेत्या माजी खासदार नवनीत राणा यांनी शहरातील पाचही गोडाऊनला प्रत्यक्ष भेट देऊन पाहणी केली. यावेळी त्यांनी पॅकिंग सुरू असलेल्या किराणा साहित्याची तपासणी केली तसेच साहित्याची उपलब्धता, वर्गीकरण, पॅकिंग आणि वितरणाच्या तयारीचा सविस्तर आढावा घेतला.
दिवाळी हा आनंद, उत्साह आणि आपुलकीचा सण आहे. मात्र, आर्थिक परिस्थितीमुळे अनेक गरजू कुटुंबांना हा सण अपेक्षित उत्साहात साजरा करता येत नाही. अशा कुटुंबांच्या घरातही दिवाळीचा गोडवा निर्माण व्हावा, त्यांना सणासुदीच्या काळात आवश्यक वस्तू उपलब्ध व्हाव्यात आणि त्यांच्या चेहऱ्यावर आनंद फुलावा, या सामाजिक भावनेतून राणा दाम्पत्याकडून हा उपक्रम राबविण्यात येत आहे.
या किराणा किटमध्ये दैनंदिन वापराच्या वस्तूंसह दिवाळीच्या फराळासाठी आवश्यक साहित्याचाही समावेश करण्यात आला आहे. यामध्ये साखर, खाद्यतेल, शेंगदाणे, मुरमुरे, रवा, मैदा, तिखट, मीठ, टोस्ट, चणा डाळ, पोहे, सोयाबीन वडी, सोनपापडी, विविध मसाले आणि राजगिरा लाडू आदी वस्तूंचा समावेश आहे.
विशेष म्हणजे, दरवर्षीप्रमाणे यंदाही आमदार रवि राणा यांच्यातर्फे प्रत्येक लाडक्या बहिणीला किराणा किटसोबत साडीची भेट देण्यात येणार आहे. दिवाळीच्या सणात महिलांनाही आनंदाने सहभागी होता यावे आणि त्यांच्या घरात सणाचा उत्साह निर्माण व्हावा, या उद्देशाने किराणा साहित्याबरोबर साडी देण्याची संकल्पना राबविण्यात येत आहे.
या भव्य उपक्रमासाठी अमरावती शहरात पाच वेगवेगळ्या ठिकाणी गोडाऊनची व्यवस्था करण्यात आली असून, तब्बल ५०० हून अधिक मजूर किराणा साहित्याचे वर्गीकरण, पॅकिंग आणि किट तयार करण्याच्या कामात सहभागी झाले आहेत. प्रत्येक किटमध्ये निर्धारित साहित्याचा समावेश होईल आणि वितरणादरम्यान कोणतीही अडचण निर्माण होणार नाही, यासाठी नियोजनबद्ध पद्धतीने काम सुरू आहे.
खासदार नवनीत राणा यांनी सर्व गोडाऊनला भेट देऊन प्रत्यक्ष कामाची पाहणी केल्याने पॅकिंगच्या तयारीचा आढावा घेण्यात आला. मोठ्या प्रमाणावर राबविण्यात येणाऱ्या या उपक्रमातून समाजातील गरजू आणि आर्थिकदृष्ट्या दुर्बल कुटुंबांसोबत दिवाळीचा आनंद वाटून घेण्याचा प्रयत्न केला जात आहे.
प्रत्येक गरजू कुटुंबाच्या घरात दिवाळीचा दिवा उजळावा, प्रत्येकाच्या चेहऱ्यावर आनंद फुलावा आणि सणाच्या काळात कोणतेही कुटुंब आवश्यक वस्तूंपासून वंचित राहू नये, या संकल्पनेतून राणा दाम्पत्याचा हा किराणा वाटप उपक्रम अमरावतीत राबविण्यात येत आहे.
