१४ सप्टेंबरला बाप्पांचे आगमन; सार्वजनिक गणेश मंडळांकडूनही तयारीला वेग
श्रावण मासाची सांगता होताच आता गणेशभक्तांना वेध लागले आहेत ते लाडक्या गणरायाच्या आगमनाचे. येत्या १४ सप्टेंबर रोजी श्री गणेशाचे आगमन होत असून, अमरावती शहरात गणेशोत्सवाची लगबग सुरू झाली आहे. शहरातील गणेशमूर्ती विक्रेत्यांनी विविध आकारांच्या आणि आकर्षक सजावटीच्या गणेशमूर्तींनी दुकाने सजविली असून, सार्वजनिक गणेश मंडळांनीही उत्सवाच्या तयारीला वेग दिला आहे.
गणेशोत्सवाला आता अवघे काही दिवस शिल्लक राहिल्याने शहरातील बाजारपेठांमध्ये उत्साहाचे वातावरण निर्माण झाले आहे. गणेशमूर्ती विक्रेत्यांनी लहान, मध्यम आणि मोठ्या आकारांच्या तसेच विविध आकर्षक स्वरूपातील गणेशमूर्ती विक्रीसाठी उपलब्ध करून दिल्या आहेत. पर्यावरणपूरक मूर्तींसह पारंपरिक आणि आधुनिक शैलीतील मूर्तींनाही यंदा मोठी मागणी असल्याचे विक्रेत्यांचे म्हणणे आहे.
दरवर्षीप्रमाणे यंदाही गौरी-गणेश उत्सव मोठ्या उत्साहात साजरा करण्यासाठी गणेशभक्त सज्ज झाले आहेत. शहरातील सार्वजनिक गणेश मंडळांनी मंडप उभारणी, विद्युत रोषणाई, देखावे आणि डेकोरेशनच्या कामांना सुरुवात केली असून, कार्यकर्ते उत्सवाच्या नियोजनात व्यस्त आहेत.
गणेशमूर्तींची दुकाने सजली असून सार्वजनिक गणेश मंडळांमध्येही मंडप उभारणी आणि सजावटीच्या कामांना वेग आला आहे. त्यामुळे बाप्पांच्या आगमनापूर्वीच अमरावती शहरात गणेशोत्सवाचा उत्साह सर्वत्र पाहायला मिळत आहे.
