पुणे कस्टम्सची मोठी कारवाई; सोलापूरजवळ 6.54 कोटींचा 1,309 किलो गांजा जप्त
गुप्त माहितीच्या आधारे ट्रक अडवून कारवाई; 46 गोण्यांमध्ये लपवलेली 636 पाकिटे जप्त
पुणे: अमली पदार्थांच्या तस्करीविरोधात पुणे कस्टम्सच्या नार्कोटिक्स सेलने मोठी कारवाई केली आहे. विशिष्ट गुप्त माहितीच्या आधारे सोलापूरजवळ एका ट्रकची तपासणी करत तब्बल 1,309 किलो गांजा जप्त करण्यात आला आहे. या जप्त केलेल्या गांजाची अंदाजे किंमत 6 कोटी 54 लाख रुपये असल्याची माहिती समोर आली आहे.
कस्टम्सच्या पथकाने संशयित ट्रक अडवून त्याची सखोल तपासणी केली. यावेळी 46 गोण्यांमध्ये लपवून ठेवलेली 636 पाकिटे आढळून आली. तपासणी केल्यानंतर या पाकिटांमध्ये मोठ्या प्रमाणात गांजा असल्याचे स्पष्ट झाले.
या प्रकरणी संबंधित व्यक्तींविरोधात नियमानुसार कारवाई सुरू करण्यात आली असून, अमली पदार्थांच्या या तस्करीमागे नेमके कोण आहेत आणि हा माल कुठे नेण्यात येत होता, याचा तपास केला जात आहे.
अमली पदार्थांची तस्करी आणि बेकायदेशीर वाहतुकीविरोधात पुणे कस्टम्सने कारवाई अधिक तीव्र करण्याचा निर्धार व्यक्त केला आहे. मोठ्या प्रमाणातील या जप्तीमुळे अमली पदार्थ तस्करांमध्ये खळबळ उडाली आहे.
