इटान–पवना रस्ता ३५ वर्षांपासून प्रतीक्षेत; चिखल, खड्डे आणि जीवघेणा प्रवास नागरिकांच्या नशिबी

भंडारा जिल्ह्यातील लाखांदूर तालुक्यातील तीन किलोमीटरचा रस्ता बनला मृत्यूचा सापळा; ग्रामस्थांचा तीव्र आंदोलनाचा इशारा

भंडारा | प्रतिनिधी

भंडारा जिल्ह्यातील लाखांदूर तालुक्यातील इटान ते पवना या अवघ्या तीन किलोमीटरच्या रस्त्याची दुरवस्था नागरिकांसाठी गंभीर समस्या ठरत आहे. गेल्या तब्बल ३५ वर्षांपासून या रस्त्याच्या दुरुस्तीच्या केवळ घोषणा आणि आश्वासने दिली जात आहेत. मात्र प्रत्यक्षात कोणतेही काम न झाल्याने पावसाळ्यात हा रस्ता चिखल आणि खड्ड्यांनी भरून मृत्यूच्या सापळ्यात रूपांतरित झाला आहे. त्यामुळे विद्यार्थी, शेतकरी, महिला, रुग्ण आणि सर्वसामान्य नागरिकांना दररोज जीव धोक्यात घालून प्रवास करावा लागत आहे.

पावसाळा सुरू होताच संपूर्ण रस्ता चिखलाने व्यापला जातो. अनेक ठिकाणी मोठमोठे खड्डे पडल्याने दुचाकी आणि चारचाकी वाहनचालकांना मोठी कसरत करावी लागत असून पादचाऱ्यांचाही प्रवास धोकादायक बनला आहे. रस्त्याच्या खराब अवस्थेमुळे अपघाताचा धोका सातत्याने वाढत असल्याची नागरिकांची तक्रार आहे.

या रस्त्याचा सर्वाधिक फटका शाळेत जाणाऱ्या विद्यार्थ्यांना बसत आहे. अनेक विद्यार्थ्यांना चिखलातून पायी चालत शाळेत जावे लागत असून त्यांचे शैक्षणिक नुकसानही होत आहे. तसेच रुग्णांना वेळेत दवाखान्यात पोहोचणे कठीण होत असल्याने आपत्कालीन परिस्थितीत जीवितहानीची भीती व्यक्त केली जात आहे.

शेतकऱ्यांनाही शेतीमाल बाजारात नेण्यासाठी मोठ्या अडचणींचा सामना करावा लागत आहे. वाहतूक खर्च वाढण्याबरोबरच शेतीमाल वेळेत बाजारात पोहोचत नसल्याने आर्थिक नुकसान होत असल्याचे शेतकऱ्यांनी सांगितले.

ग्रामस्थांच्या म्हणण्यानुसार, गेल्या ३५ वर्षांपासून रस्त्याच्या दुरुस्तीसाठी अनेकदा निवेदने देण्यात आली, पाठपुरावा करण्यात आला आणि लोकप्रतिनिधींकडे मागणी करण्यात आली. मात्र प्रत्येकवेळी केवळ आश्वासनांवरच समाधान मानावे लागले. प्रत्यक्षात रस्त्याच्या कामाला आजपर्यंत सुरुवात झालेली नाही.

एकेकाळी या मार्गावर बससेवा सुरू होती. मात्र रस्त्याची अवस्था इतकी बिकट झाली आहे की आज पायी चालणेही धोकादायक बनले आहे. निवडणुकांच्या काळात गावाची आठवण काढणारे लोकप्रतिनिधी रस्त्याच्या प्रश्नाकडे मात्र दुर्लक्ष करत असल्याची संतप्त भावना ग्रामस्थांनी व्यक्त केली आहे.

रस्त्याचे काम तातडीने सुरू न झाल्यास तीव्र जनआंदोलन छेडण्याचा इशारा ग्रामस्थांनी प्रशासनाला दिला आहे. त्यामुळे प्रशासन आणि लोकप्रतिनिधी या प्रश्नाची गांभीर्याने दखल घेऊन नागरिकांना दिलासा देणार का, याकडे संपूर्ण परिसराचे लक्ष लागले आहे.

अवघ्या तीन किलोमीटरच्या रस्त्यासाठी नागरिकांना तब्बल ३५ वर्षे संघर्ष करावा लागत असल्याने विकासाच्या दाव्यांवर प्रश्नचिन्ह उपस्थित होत आहे. इटान ते पवना रस्त्याचे काम नेमके कधी सुरू होणार आणि नागरिकांना सुरक्षित प्रवासाची सुविधा कधी मिळणार, याचीच आता सर्वांना प्रतीक्षा आहे.