पुसदमध्ये 26 वर्षीय विवाहित महिलेचा मृतदेह आढळला; मृत्यूचे कारण अद्याप अस्पष्ट
नदीच्या पुलाजवळ मृतदेह सापडल्याने खळबळ; पोलिसांचा तपास सुरू
पुसद | प्रतिनिधी
यवतमाळ जिल्ह्यातील पुसद शहरात 26 वर्षीय विवाहित महिलेचा मृतदेह नदीच्या पुलाजवळ आढळून आल्याने परिसरात खळबळ उडाली आहे. या घटनेमुळे शहरात हळहळ व्यक्त होत असून मृत्यूचे नेमके कारण अद्याप स्पष्ट झालेले नाही. पोलिसांनी आकस्मिक मृत्यूची नोंद करून पुढील तपास सुरू केला आहे.
पोलिसांकडून मिळालेल्या माहितीनुसार, श्रीरामपूर परिसरात राहणाऱ्या पायल अनिल बोम्पीलवार (वय 26) यांचा मृतदेह 1 ऑगस्ट रोजी सकाळी शहरातील नदीच्या पुलाजवळ आढळून आला. घटनेची माहिती मिळताच कुटुंबीयांनी त्यांना तातडीने पुसद येथील शासकीय रुग्णालयात नेले. मात्र, वैद्यकीय अधिकाऱ्यांनी तपासणीनंतर त्यांना मृत घोषित केले.
मृत महिलेच्या आई सौ. अंजली अतुल नाटेकर यांनी पुसद शहर पोलीस ठाण्यात दिलेल्या जबाबानुसार, पायल या काही काळापासून पतीपासून वेगळ्या राहत होत्या आणि कौटुंबिक कारणांमुळे मानसिक तणावात असल्याचे नमूद केले आहे. तसेच या घटनेबाबत कोणावरही संशय नसल्याचेही त्यांनी स्पष्ट केले आहे.
घटनेची माहिती मिळाल्यानंतर पुसद शहर पोलीस ठाण्याचे पोलीस उपनिरीक्षक संतोष खांडेकर यांनी घटनास्थळी भेट देत पंचनामा केला. मृत्यूचे नेमके कारण निश्चित करण्यासाठी आवश्यक कायदेशीर प्रक्रिया सुरू असून, पोलिसांकडून सर्व बाजूंनी तपास करण्यात येत आहे.
पोलीस तपास आणि वैद्यकीय अहवालानंतरच मृत्यूमागील नेमके कारण स्पष्ट होणार असून, तोपर्यंत कोणत्याही निष्कर्षापर्यंत पोहोचणे योग्य ठरणार नाही, असे पोलिसांनी सांगितले आहे.
