राज्यभरात औषध माफियांवर FDAची धडक कारवाई; एका दिवसात ₹3.73 लाखांचा बेकायदेशीर औषध साठा जप्त
आयुक्त तुकाराम मुंडे यांच्या आदेशानुसार कल्याण, नागपूर, कोल्हापूर, अकोला आणि मुंबईत छापे; विनापरवाना औषध साठा व विक्रीवर कारवाई
मुंबई | प्रतिनिधी
राज्यात बेकायदेशीर औषध साठा आणि विनापरवाना औषध विक्रीविरोधात अन्न व औषध प्रशासनाने (FDA) विशेष मोहीम हाती घेत मोठी कारवाई केली आहे. आयुक्त तुकाराम मुंडे यांच्या निर्देशानुसार राज्यभर टाकण्यात आलेल्या छाप्यांमध्ये एका दिवसात एकूण ₹3 लाख 73 हजार किमतीचा औषध साठा जप्त करण्यात आला. कल्याण, नागपूर, कोल्हापूर, अकोला आणि मुंबई येथे ही कारवाई करण्यात आली.
अन्न व औषध प्रशासनाने दिलेल्या माहितीनुसार, कल्याण पूर्वेतील खडेगोळवली परिसरातील प्रकाश पॉलीक्लिनिक येथे छापा टाकण्यात आला. तपासादरम्यान आवश्यक परवान्याशिवाय औषधांचा साठा करून रुग्णांवर उपचार सुरू असल्याचे आढळून आले. यावेळी ₹1 लाख 36 हजार 690 किमतीचा औषध साठा जप्त करण्यात आला.
प्रशासनाने स्पष्ट केले की, आवश्यक परवान्याशिवाय औषधांचा साठा करणे किंवा औषधोपचार करणे हे औषध आणि सौंदर्य प्रसाधन कायदा, 1940 मधील तरतुदींचे उल्लंघन आहे.
राज्यातील इतर कारवायांमध्ये नागपूरमध्ये ‘For Export Only’ असे लेबल असलेला ₹74 हजार किमतीचा औषध साठा जप्त करण्यात आला. तसेच एनडीपीएस कायद्याच्या कथित उल्लंघनप्रकरणी सुमारे 7 हजार कॅप्सूल, अंदाजे ₹71 हजार किमतीच्या, जप्त करण्यात आल्या.
कोल्हापूरमध्ये चुकीच्या लेबलिंगमुळे ₹6 हजार किमतीचे आयुर्वेदिक चूर्ण जप्त करण्यात आले. अकोल्यात एमटीपी किटच्या कथित बेकायदेशीर विक्रीप्रकरणी ₹5 हजार किमतीची औषधे जप्त करण्यात आली. तर मुंबईत विनापरवाना तयार करण्यात आलेला ₹1 लाख 10 हजार किमतीचा हँड क्लिंजरचा साठाही जप्त करण्यात आला.
अन्न व औषध प्रशासनाच्या माहितीनुसार, 24 जुलै रोजी राज्यभर राबविण्यात आलेल्या या विशेष मोहिमेत एकाच दिवशी एकूण ₹3 लाख 73 हजार किमतीचा बेकायदेशीर औषध साठा जप्त करण्यात आला. अशा प्रकारच्या बेकायदेशीर औषध साठा आणि विक्रीविरोधातील कारवाई पुढेही अधिक तीव्रतेने सुरू ठेवण्यात येणार असल्याचे प्रशासनाने स्पष्ट केले आहे.
नागरिकांनी औषधे केवळ परवानाधारक औषध विक्रेत्यांकडूनच खरेदी करावीत आणि संशयास्पद औषध विक्री आढळल्यास अन्न व औषध प्रशासनाला तत्काळ माहिती द्यावी, असे आवाहनही प्रशासनाच्या वतीने करण्यात आले आहे.
