लकडगंज परिसरात देहव्यापाराविरोधात पोलिसांची कारवाई; पीडित महिलेची सुटका
गुन्हे शाखेच्या सामाजिक सुरक्षा विभागाची धडक कारवाई; महिलेला देहव्यापारासाठी प्रवृत्त केल्याप्रकरणी महिलेवर गुन्हा
नागपूर | प्रतिनिधी
नागपूर शहरातील लकडगंज परिसरात गुन्हे शाखेच्या सामाजिक सुरक्षा विभागाने देहव्यापाराविरोधात कारवाई करत एका पीडित महिलेची सुटका केली आहे. या प्रकरणी महिलांना पैशांचे आमिष दाखवून देहव्यापारासाठी प्रवृत्त केल्याचा आरोप असलेल्या एका महिलेविरुद्ध गुन्हा दाखल करण्यात आला असून, पुढील तपास लकडगंज पोलीस करीत आहेत.
पोलिसांनी दिलेल्या माहितीनुसार, लकडगंज पोलीस ठाण्याच्या हद्दीतील गंगा-जमुना वस्ती, दिल्ली गल्ली, खत्री किराणा परिसरात महिलांना आर्थिक आमिष दाखवून देहव्यापार करण्यास प्रवृत्त केले जात असल्याची गोपनीय माहिती गुन्हे शाखेच्या सामाजिक सुरक्षा विभागाला मिळाली होती. या माहितीची पडताळणी केल्यानंतर पोलिसांनी सापळा रचून संबंधित ठिकाणी छापा टाकला.
कारवाईदरम्यान एका पीडित महिलेची सुटका करण्यात आली. प्राथमिक चौकशीत आरोपी महिला स्वतःच्या आर्थिक फायद्यासाठी जागा उपलब्ध करून देत तसेच महिलांना पैशांचे आमिष दाखवून देहव्यापार करण्यास प्रवृत्त करत असल्याचे पोलिसांच्या तपासात समोर आल्याची माहिती देण्यात आली.
या प्रकरणी मुन्नीबाई सुरेश काळवेकर (वय ६६, रा. गंगा-जमुना वस्ती, लकडगंज, नागपूर) यांच्याविरुद्ध भारतीय न्याय संहितेतील संबंधित कलमे तसेच अनैतिक देहव्यापार (प्रतिबंध) कायद्या अंतर्गत लकडगंज पोलीस ठाण्यात गुन्हा दाखल करण्यात आला आहे.
सुटका करण्यात आलेल्या पीडित महिलेला पुढील कायदेशीर प्रक्रियेसाठी लकडगंज पोलिसांच्या ताब्यात देण्यात आले असून, आरोपीचा शोध आणि प्रकरणाचा पुढील तपास सुरू आहे.
ही कारवाई नागपूर शहर पोलिसांच्या वरिष्ठ अधिकाऱ्यांच्या मार्गदर्शनाखाली गुन्हे शाखेच्या सामाजिक सुरक्षा विभागाच्या पथकाने केली. दरम्यान, देहव्यापारासारख्या बेकायदेशीर प्रकारांविरोधात कारवाई सुरूच राहणार असल्याचे पोलिसांनी स्पष्ट केले असून, अशा गुन्ह्यांची माहिती नागरिकांनी तातडीने पोलिसांना देऊन सहकार्य करावे, असे आवाहनही करण्यात आले आहे.
