वर्धा ते शिर्डी आणि शेगावसाठी नवीन एसटी बससेवा सुरू
पालकमंत्री पंकज भोयर यांच्या हस्ते शुभारंभ; साईबाबा व श्री गजानन महाराजांच्या भाविकांना मोठा दिलासा
वर्धा | प्रतिनिधी
वर्धा जिल्ह्यातील साईबाबा आणि श्री गजानन महाराजांच्या भाविकांसाठी आनंदाची बातमी समोर आली आहे. अनेक दिवसांपासून प्रलंबित असलेली मागणी पूर्ण करत वर्धा ते शिर्डी आणि वर्धा ते शेगाव या दोन नवीन एसटी बससेवांचा शनिवारी शुभारंभ करण्यात आला. पालकमंत्री पंकज भोयर यांच्या पुढाकारातून सुरू झालेल्या या बससेवेमुळे हजारो भाविकांचा प्रवास अधिक सुलभ होणार आहे.
या नव्या बससेवांमुळे वर्धा जिल्ह्यातील नागरिकांना शिर्डी आणि शेगाव या प्रमुख धार्मिक स्थळांपर्यंत थेट प्रवासाची सुविधा उपलब्ध झाली आहे. त्यामुळे भाविकांमध्ये समाधानाचे वातावरण असून या निर्णयाचे सर्व स्तरांतून स्वागत करण्यात येत आहे.
पालकमंत्री पंकज भोयर यांच्या हस्ते झालेल्या शुभारंभ सोहळ्यात अनेक दिवसांपासून प्रलंबित असलेल्या या मागणीची पूर्तता झाल्याचा आनंद भाविकांनी व्यक्त केला. धार्मिक स्थळांसाठी नियमित आणि थेट बससेवा उपलब्ध झाल्याने प्रवास अधिक सुरक्षित, सोयीस्कर आणि वेळेची बचत करणारा ठरणार आहे.
नवीन वेळापत्रकानुसार वर्धा ते शिर्डी बस दररोज सकाळी ६.३० वाजता वर्धा येथून रवाना होणार आहे. तसेच वर्धा ते शेगाव बससेवा दररोज दुपारी १२ वाजता सुरू करण्यात आली आहे.
याच कार्यक्रमात वर्धा विभागाला प्राप्त झालेल्या नव्या एसटी बसेसचेही लोकार्पण करण्यात आले. यावेळी पालकमंत्री पंकज भोयर यांनी नव्याने दाखल झालेल्या बसमधून प्रवास करून बससेवेची पाहणी केली तसेच प्रवाशांना दर्जेदार आणि सुरक्षित सेवा देण्यावर भर देण्याचे निर्देश दिले.
या नव्या बससेवांमुळे धार्मिक पर्यटनाला चालना मिळण्याबरोबरच सर्वसामान्य प्रवाशांचीही मोठी सोय होणार असल्याची भावना भाविकांनी व्यक्त केली. राज्य परिवहन महामंडळाच्या या उपक्रमामुळे वर्धा जिल्ह्यातील प्रवाशांना अधिक चांगली वाहतूक सुविधा उपलब्ध होणार असल्याचेही यावेळी सांगण्यात आले.
