मेळघाटात पोलिसांचा धडाका! गांजा जप्तीच्या कारवाईने अवैध धंदेगारांचे धाबे दणाणले

“भगवान कदम साहेबांचे भले करो” – महिलांकडून पोलिसांच्या धडक मोहिमेचे स्वागत

धारणी | प्रतिनिधी

मेळघाटातील धारणी शहरात पोलिसांनी अमली पदार्थांविरोधात केलेल्या मोठ्या कारवाईमुळे संपूर्ण परिसरात खळबळ उडाली आहे. अवैध गांजा विक्री आणि साठवणुकीविरोधात राबविण्यात आलेल्या विशेष मोहिमेत पोलिसांनी तब्बल ५ किलो १५६ ग्रॅम गांजा जप्त केला असून सुमारे ९९ हजार ४२० रुपयांचा मुद्देमाल हस्तगत केला आहे. या कारवाईनंतर अवैध धंदे करणाऱ्यांमध्ये भीतीचे वातावरण निर्माण झाले असून सामान्य नागरिक आणि विशेषतः महिलांकडून पोलिसांच्या या कारवाईचे जोरदार स्वागत केले जात आहे.

अमरावती जिल्ह्याचे पोलीस अधीक्षक निकेतन कदम यांनी पदभार स्वीकारल्यानंतर जिल्हाभर अवैध धंद्यांविरोधात कठोर भूमिका घेतली आहे. जिल्ह्यातील विविध भागांमध्ये सुरू असलेल्या धडक मोहिमेचा परिणाम आता दुर्गम मेळघाटातही स्पष्टपणे दिसून येत आहे. धारणीसारख्या आदिवासी बहुल भागात अमली पदार्थ, जुगार आणि अवैध दारूच्या व्यवसायामुळे अनेक कुटुंबांचे संसार उद्ध्वस्त होत असल्याच्या तक्रारी सातत्याने समोर येत होत्या.

धारणी आणि आसपासच्या परिसरात काही ठिकाणी वरळी, जुगार, गावठी दारू आणि गांजाच्या अवैध व्यापाराने सामाजिक परिस्थिती बिघडल्याचे चित्र होते. अनेक युवक व्यसनांच्या आहारी जात होते, तर कुटुंबांमध्ये आर्थिक आणि सामाजिक संकटे वाढत होती. या पार्श्वभूमीवर पोलिसांनी सुरू केलेल्या कारवाईमुळे नागरिकांमध्ये आशेचे वातावरण निर्माण झाले आहे.

विशेष म्हणजे पोलीस अधीक्षक निकेतन कदम यांनी आपल्या सेवाकाळातील प्रोबेशनचा काही कालावधी धारणी येथे घालवला होता. त्यामुळे मेळघाटातील सामाजिक परिस्थिती, भौगोलिक आव्हाने आणि स्थानिक प्रश्नांची त्यांना जवळून माहिती आहे. जिल्ह्याची सूत्रे हाती घेतल्यानंतर त्यांनी मेळघाटकडे विशेष लक्ष केंद्रित केले असून त्याचे सकारात्मक परिणाम आता दिसू लागले आहेत.

गांजा जप्तीच्या या कारवाईनंतर गावागावांतील महिलांनी समाधान व्यक्त केले आहे. अनेकांनी पोलिसांच्या मोहिमेमुळे घरातील पुरुष आणि युवक व्यसनांपासून दूर राहतील, अशी अपेक्षा व्यक्त केली. “भगवान कदम साहेबांचे भले करो, त्यांनी आमचे संसार वाचवले,” अशा भावना महिलांनी व्यक्त केल्याचे समोर आले आहे.

स्थानिकांच्या म्हणण्यानुसार, अवैध धंद्यांमुळे गरीब आणि आदिवासी कुटुंबांवर सर्वाधिक परिणाम होत होता. कुटुंबातील कमावते सदस्य व्यसनांच्या आहारी गेल्याने आर्थिक अडचणी वाढत होत्या. मुलांच्या शिक्षणावर परिणाम होत होता आणि घरगुती कलहाचे प्रमाणही वाढले होते. पोलिसांच्या कारवाईमुळे या परिस्थितीत बदल होण्याची आशा निर्माण झाली आहे.

दरम्यान, पोलिसांनी जप्त केलेल्या गांजाच्या पुरवठ्यामागील संपूर्ण साखळीचा शोध घेण्यास सुरुवात केली आहे. या रॅकेटमध्ये आणखी कोणाचा सहभाग आहे, गांजा कुठून आणला जात होता आणि कोणत्या माध्यमातून त्याची विक्री केली जात होती याचा तपास सुरू आहे. त्यामुळे येत्या काही दिवसांत आणखी मोठ्या कारवाया होण्याची शक्यता वर्तवली जात आहे.

पोलीस अधीक्षक निकेतन कदम यांनी जिल्ह्यात “झिरो टॉलरन्स” धोरण स्वीकारत अवैध धंदे, अमली पदार्थ, जुगार आणि समाजविघातक प्रवृत्तींविरोधात कठोर मोहीम सुरू ठेवण्याचे संकेत दिले आहेत. त्यामुळे सामान्य नागरिकांचा पोलिसांवरील विश्वास अधिक दृढ होत असून कायदा-सुव्यवस्था मजबूत करण्यासाठी प्रशासन कटिबद्ध असल्याचे दिसून येत आहे.

मेळघाटातील या कारवाईने केवळ अवैध धंदे करणाऱ्यांनाच धक्का दिलेला नाही, तर अनेक कुटुंबांना नव्याने जगण्याची उमेद दिली आहे. पोलिसांच्या धडक मोहिमेमुळे मेळघाटात सकारात्मक बदलाची नांदी दिसू लागली असून आगामी काळात या कारवायांचा वेग आणखी वाढणार का, याकडे संपूर्ण जिल्ह्याचे लक्ष लागले आहे.