अमरावतीत मध्यरात्री जुगार अड्ड्यावर पोलिसांचा धाडसी छापा; २० हून अधिक जुगारी ताब्यात, ६.९२ लाखांचा मुद्देमाल जप्त
अमरावती शहर झोपेत असताना मध्यरात्री लाखोंचा जुगार रंगात आला होता… पण गाडगेनगर पोलिसांच्या अचानक धाडीनंतर संपूर्ण अड्ड्यावर एकच खळबळ उडाली. नागपुरी गेट पोलीस स्टेशन हद्दीत गाडगेनगर पोलिसांनी मध्यरात्री मोठी कारवाई करत जुगार अड्ड्यावर छापा टाकला आणि २० हून अधिक आरोपींना ताब्यात घेतले.
मिळालेल्या माहितीनुसार, गाडगेनगर पोलिसांना गुप्त माहिती मिळाली होती की, नागपुरी गेट पोलीस स्टेशन हद्दीत मध्यरात्री मोठ्या प्रमाणात जुगार सुरू आहे. या माहितीच्या आधारे पोलिसांनी नियोजनबद्ध पद्धतीने कारवाईची आखणी केली.
या धाडसी ऑपरेशनसाठी तब्बल ५० पेक्षा अधिक पोलीस कर्मचारी तैनात करण्यात आले होते. मध्यरात्री पोलिसांनी जुगार अड्ड्यावर अचानक छापा टाकताच एकच गोंधळ उडाला. काही जणांनी पळण्याचा प्रयत्न केला, मात्र पोलिसांनी संपूर्ण परिसराला वेढा घालत सर्वांना ताब्यात घेतले.
या कारवाईत पोलिसांनी २० पेक्षा अधिक आरोपींना ताब्यात घेतले असून, त्यांच्या ताब्यातून २१ मोबाईल फोन जप्त करण्यात आले. याशिवाय २ लाख १० हजार रुपयांहून अधिक रोख रक्कमही जप्त करण्यात आली.
छाप्यात जप्त करण्यात आलेल्या रोख रकमेसह मोबाईल फोन आणि इतर साहित्य असा एकूण ६ लाख ९२ हजार रुपयांचा मुद्देमाल पोलिसांनी हस्तगत केला आहे. या कारवाईमुळे अमरावतीतील बेकायदेशीर जुगार व्यवसायाला मोठा धक्का बसला आहे.
ही संपूर्ण कारवाई गाडगेनगर पोलीस स्टेशनचे पोलीस निरीक्षक गोरखनाथ जाधव यांच्या नेतृत्वाखाली पार पडली. सध्या सर्व आरोपींवर गुन्हा नोंदविण्याची प्रक्रिया सुरू असून, पुढील तपास पोलिसांकडून केला जात आहे.
अमरावतीत मध्यरात्री सुरू असलेल्या या बेकायदेशीर जुगार अड्ड्यावर पोलिसांनी टाकलेल्या धाडसी छाप्यामुळे गुन्हेगारी वर्तुळात खळबळ उडाली आहे. कायद्याला चकवा देत सुरू असलेल्या अशा बेकायदेशीर धंद्यांवर पोलिसांची करडी नजर असल्याचा इशारा या कारवाईतून पुन्हा एकदा देण्यात आला आहे.
