भंडारा : शाळा सुटली की आनंदाने घरी जाण्याऐवजी, अड्याळ येथील बस स्थानकावर दररोज ‘मृत्यूचा थरार’ पाहायला मिळत आहे. बस स्थानकात शिरताच शेकडो विद्यार्थी आपल्या जीवाची पर्वा न करता चालत्या बसच्या मागे धावत सुटतात. या अंगावर शहारे आणणाऱ्या प्रकारामुळे एखादा मोठा अपघात होण्याची शक्यता निर्माण झाली असून, प्रशासन मात्र ढिम्म हलण्यास तयार नाही.
नेमका प्रकार काय?
अड्याळ परिसरातील ग्रामीण भागातील विद्यार्थी शिक्षणासाठी याठिकाणी येतात. शाळा सुटल्यानंतर घरी जाण्यासाठी विद्यार्थ्यांची मोठी गर्दी होते. बस स्थानकावर बस येताच, जागा पकडण्याच्या नादात विद्यार्थी बसच्या दाराला लटकतात किंवा मागे धावतात. सोशल मीडियावर या प्रकाराचे व्हिडिओ व्हायरल झाले असून, ते पाहून पालकांचा काळजाचा ठोका चुकत आहे.
पालकांचा संतप्त सवाल: जबाबदारी कुणाची?
या गंभीर परिस्थितीमुळे पालकांमध्ये भीतीचे वातावरण आहे. “आमची मुलं सुरक्षित घरी परततील याची खात्री राहिलेली नाही,” अशी भावना पालक व्यक्त करत आहेत.
- शाळा प्रशासन: “शिक्षकांची जबाबदारी फक्त वर्गापुरतीच मर्यादित आहे का?” असा सवाल पालक विचारत आहेत.
- एसटी महामंडळ: बस स्थानकावर शिस्त लावण्यासाठी सुरक्षा रक्षक किंवा वाहक-चालकांचे नियंत्रण का नाही?
- प्रशासन: एखादा बळी गेल्यावरच प्रशासनाला जाग येणार का?
उपेक्षित सुरक्षा आणि वाढता धोका
बस स्थानकावर कोणतीही रांग किंवा शिस्त पाळली जात नाही. अनेकदा बस पूर्णपणे थांबण्यापूर्वीच विद्यार्थी पायरीवर चढण्याचा प्रयत्न करतात. वाहनांमधून निघणारा धूर आणि वाढती गर्दी यामुळे आधीच नागरिक त्रस्त असताना, आता विद्यार्थ्यांच्या सुरक्षिततेचा प्रश्न ऐरणीवर आला आहे.
“शाळा सुटल्यावर बस स्थानकावर विद्यार्थ्यांची शिस्त पाहणारे कोणीच नाही. दररोज हा जीवघेणा प्रवास सुरू आहे. प्रशासनाने तात्काळ पावले उचलली नाहीत, तर होणाऱ्या अपघाताला सर्वस्वी प्रशासन जबाबदार असेल.” — संतप्त पालकांची प्रतिक्रिया
रिपोर्टर: साहिल रामटेके
