“अमरावतीत विठुरायाच्या पालखीची भक्तिमय मिरवणूक; साईनगरमध्ये सप्ताह व महाप्रसादाने गजर”

अमरावती : साईनगर अमरावतीत भव्य सप्ताह व आषाढी पालखी सोहळा!
देवशयनी आषाढी एकादशी निमित्त वन वैभव फॉरेस्ट कॉलनी, साईनगर, अमरावती येथे भक्तिरसात न्हालेला विठुरायाचा पालखी सोहळा आणि सप्ताह कार्यक्रमाचे उत्साही आयोजन करण्यात आले होते.

गृह निर्माण सहकारी संस्था अंतर्गत झालेल्या या कार्यक्रमात अध्यक्ष श्री ज्ञानेश्वर भारसाकडे, सचिव श्री रमेश बोके, तसेच संचालक मंडळातील श्री चंद्रकांत पुसदकर, सुनील काकडे, सहदेव बावणे यांचे महत्त्वपूर्ण योगदान लाभले.

सप्ताह सोहळा आणि भक्तीमय प्रवचन

दिनांक 30 जून ते 7 जुलै 2025 या कालावधीत संपन्न झालेल्या सप्ताह कार्यक्रमात सुप्रसिद्ध कीर्तनकार ह.भ.प. गणेश गिरी महाराज यांचे ज्ञानेश्वरी भावकथेचे निरूपण झाले. त्यांनी ज्ञानेश्वरीतील भक्ती योग, कर्मयोग, ज्ञान योग, गीतेची दृष्टी, ज्ञानदेवांचे तत्त्वज्ञान आणि पसायदान या विषयांवर प्रभावी मार्गदर्शन केले.

महिला मंडळ व नागरिकांचा उल्लेखनीय सहभाग

या सोहळ्यात दीप नगर, साहू नगर, हरीशांती कॉलनी येथील महिला व पुरुषांनी भक्तिभावाने सहभाग घेतला.
महिला भजन मंडळातील सौ. मीनाताई गुहे, शालिनीताई भारसाकडे, राजश्री गडपलीवार, मीराताई बावणे, बोके ताई यांचा सेवाभावी सहभाग लक्षणीय ठरला.

आषाढी एकादशी दिवशी पालखी मिरवणूक व जयघोष

7 जुलै 2025 रोजी देवशयनी आषाढी एकादशी निमित्त विठुरायाच्या पालखीचे नगर भ्रमण अत्यंत भक्तिभावात पार पडले.
गुरुदेव सेवा मंडळ सेलू-चिखली तसेच परिसरातील लहान मुले-मुली, महिला आणि नागरिकांनी टाळ-मृदुंगांच्या गजरात, हरिनामाचा जयघोष करत मिरवणूक पार पाडली.

काल्याचे कीर्तन व महाप्रसादाने समारोप

एकादशी दिवशी सायंकाळी काल्याचे कीर्तन पार पडले. त्यानंतर महाप्रसादाचे आयोजन करण्यात आले. परिसरातील असंख्य भाविकांनी महाप्रसादाचा लाभ घेत ‘हरिनामाचा गजर अविरत सुरु राहो’ हा संदेश दिला.