मुंबईत आगीचा भीषण तांडव! विद्याविहारमधील स्कायलाइन विहार इमारतीच्या तीन मजल्यांना आग; लाखोंचे नुकसान होण्याची शक्यता
रात्री ११ वाजता लागलेल्या आगीने तासाभरात घेतले रौद्र रूप; विद्याविहार रेल्वे स्थानकाला लागून असलेल्या इमारतीत अग्नितांडव, अग्निशमन दलाचे मध्यरात्रीपर्यंत आग विझविण्याचे प्रयत्न
मुंबई : देशाची आर्थिक राजधानी असलेल्या मुंबईत आगीच्या घटनांचे सत्र सुरूच असून, रविवारी रात्री विद्याविहार परिसरात भीषण अग्नितांडव पाहायला मिळाले. विद्याविहार रेल्वे स्थानकाला लागून असलेल्या स्कायलाइन विहार या इमारतीला रात्री सुमारे ११ वाजताच्या सुमारास अचानक आग लागली. सुरुवातीला इमारतीच्या सर्वांत वरच्या मजल्यांवर लागलेली आग काही वेळातच प्रचंड भडकली आणि खालच्या दिशेने पसरली. अवघ्या तासाभरात आगीने रौद्र रूप धारण केले. या दुर्घटनेत इमारतीचे तीन मजले आगीच्या भक्ष्यस्थानी पडून जळून खाक झाल्याची माहिती समोर आली आहे.
आगीची माहिती मिळताच अग्निशमन दलाला पाचारण करण्यात आले. मात्र, अग्निशमन दलाचे पथक घटनास्थळी पोहोचण्यास सुमारे एक तास लागल्याची माहिती आहे. त्यानंतर जवानांनी तातडीने आग विझविण्याचे काम हाती घेतले. आगीची तीव्रता अधिक असल्याने अग्निशमन कर्मचाऱ्यांना मोठ्या आव्हानाचा सामना करावा लागला. मध्यरात्री उशिरापर्यंत आग आटोक्यात आणण्यासाठी आणि परिस्थिती नियंत्रणात आणण्यासाठी प्रयत्न सुरू होते.
दरम्यान, रविवारची सुट्टी असल्याने ही व्यावसायिक इमारत तुलनेने रिकामी असण्याची शक्यता व्यक्त केली जात होती. त्यामुळे कार्यालयांमध्ये कर्मचारी किंवा नागरिकांची उपस्थिती कमी असावी, असा प्राथमिक अंदाज वर्तविण्यात येत आहे. मात्र, या दुर्घटनेत कोणतीही जीवितहानी झाली आहे का, याबाबत अधिकृत माहिती समोर आलेली नाही.
विशेष म्हणजे, आगीचे नेमके कारण अद्याप स्पष्ट झालेले नाही. शॉर्टसर्किट किंवा अन्य कारणामुळे आग लागली का, याचा तपास संबंधित यंत्रणांकडून केला जाणार आहे. आगीमुळे इमारतीचे मोठ्या प्रमाणात नुकसान झाले असून, आर्थिक नुकसानीचा नेमका आकडा अद्याप समजू शकलेला नाही.
एकीकडे दिवाळीच्या काळात मुंबईत विविध ठिकाणी आगीच्या घटना समोर येत असताना विद्याविहारमधील या भीषण दुर्घटनेने पुन्हा एकदा अग्निसुरक्षेचा प्रश्न ऐरणीवर आणला आहे. व्यावसायिक इमारतींमधील अग्निसुरक्षा यंत्रणा, आपत्कालीन बाहेर पडण्याचे मार्ग आणि अग्निशमन व्यवस्थेची सज्जता याबाबत आता गंभीरपणे विचार करण्याची गरज अधोरेखित झाली आहे.
विद्याविहारमधील या अग्नितांडवाचे नेमके कारण काय आणि आगीमुळे किती नुकसान झाले, हे तपासानंतरच स्पष्ट होणार आहे.
