नागपुरात वाढदिवसाच्या जल्लोषात रक्तरंजित थरार! फटाके फोडण्याच्या वादातून २७ वर्षीय तरुणाची चाकूने भोसकून हत्या
कारसमोर फटाके फोडण्यास विरोध केल्याने वाद विकोपाला; अक्षय मडावी व साथीदारांवर हत्येचा आरोप, मेडिकलमध्ये उपचारादरम्यान तरुणाचा मृत्यू; बजाजनगर पोलिसांकडून आरोपींचा शोध सुरू
नागपूर : वाढदिवसाच्या आनंदोत्सवाला हिंसक वळण लागून नागपूर शहरात हत्येची धक्कादायक घटना समोर आली आहे. कारसमोर फटाके फोडण्यावरून झालेल्या वादातून एका २७ वर्षीय तरुणावर चाकूने वार करून त्याची हत्या करण्यात आली. अमन उर्फ बॉबी सुनील सपाटे असे मृत तरुणाचे नाव आहे. या घटनेमुळे देव नगर परिसरात खळबळ उडाली असून, बजाजनगर पोलिसांनी हत्येचा गुन्हा दाखल केला आहे.
पोलिसांनी दिलेल्या माहितीनुसार, या प्रकरणातील फिर्यादी अक्षय गंगाधर नौकरकर हे आपल्या मित्रांसोबत वाढदिवस साजरा करण्यासाठी देव नगर परिसरात गेले होते. यावेळी देव नगर चौकातील एका ज्यूस दुकानासमोर काही तरुण कारसमोर फटाके फोडत होते. कारसमोर फटाके फोडण्यावरून कारचालकाने संबंधित तरुणांना हटकल्याने वादाची ठिणगी पडली.
या वादाचा राग मनात धरून आरोपी अक्षय मडावी आणि त्याच्या दोन ते तीन साथीदारांनी अमन उर्फ बॉबी याच्यासोबत वाद घातला. हा वाद पुढे विकोपाला गेल्यानंतर आरोपींनी संगनमताने अमनवर चाकूने हल्ला केला. त्याच्या पोटावर चाकूने वार करण्यात आल्याने तो गंभीर जखमी झाला.
घटनेनंतर जखमी अमनला तातडीने उपचारासाठी नागपूरच्या मेडिकल रुग्णालयात दाखल करण्यात आले. मात्र, डॉक्टरांनी तपासणी केल्यानंतर त्याला मृत घोषित केले. वाढदिवसाच्या कार्यक्रमात झालेल्या या रक्तरंजित घटनेने परिसरात भीती आणि संतापाचे वातावरण निर्माण झाले आहे.
या प्रकरणी बजाजनगर पोलीस ठाण्यात भारतीय न्याय संहितेच्या कलम १०३(१) आणि ३(५) अन्वये गुन्हा दाखल करण्यात आला आहे. आरोपी अक्षय मडावी आणि त्याच्या साथीदारांचा शोध घेण्यासाठी पोलिसांकडून तपास सुरू आहे.
फटाके फोडण्यासारख्या किरकोळ कारणावरून सुरू झालेला वाद थेट एका तरुणाच्या हत्येपर्यंत पोहोचल्याने नागपूर शहरातील कायदा व सुव्यवस्थेचा प्रश्न पुन्हा चर्चेत आला आहे. या प्रकरणातील आरोपी कधी पोलिसांच्या ताब्यात येतात, याकडे सर्वांचे लक्ष लागले आहे.
