नागपुरात अमली पदार्थविरोधी पथकाची कारवाई; २.६८ लाखांचा मुद्देमाल जप्त
सक्करदरा परिसरातील भांडे प्लॉट चौकात छापा; एमडी ड्रग्ससदृश्य पावडरसह दोघांना ताब्यात, आणखी एका आरोपीचा शोध सुरू
नागपूर : नागपूर शहरातील अमली पदार्थांच्या अवैध व्यवहारांविरोधात गुन्हे शाखेच्या अमली पदार्थविरोधी पथकाने कारवाई केली. सक्करदरा पोलीस ठाण्याच्या हद्दीतील भांडे प्लॉट चौकात करण्यात आलेल्या या कारवाईत ५२.७०० ग्रॅम एमडी ड्रग्ससदृश्य पावडरसह एकूण २ लाख ६८ हजार १०० रुपयांचा मुद्देमाल जप्त करण्यात आला. या प्रकरणी दोन आरोपींना ताब्यात घेण्यात आले असून, आणखी एका आरोपीचा शोध सुरू आहे.
पोलिसांनी दिलेल्या माहितीनुसार, ३ नोव्हेंबर २०२६ रोजी पहाटे ४.१० ते सकाळी ६.२० वाजेदरम्यान विशाल मेगा मार्टसमोरील सार्वजनिक रस्त्यालगत, भांडे प्लॉट चौक परिसरात ही कारवाई करण्यात आली. या वेळी आरोपींकडून ५२.७०० ग्रॅम एमडी ड्रग्ससदृश्य पावडर जप्त करण्यात आली. तिची किंमत १ लाख ५८ हजार १०० रुपये असल्याचे पोलिसांनी नमूद केले आहे.
याशिवाय २० हजार रुपये किमतीचा वनप्लस मोबाईल, प्रत्येकी १० हजार रुपये किमतीचे दोन व्हीवो मोबाईल आणि ७० हजार रुपये किमतीची डिओ मोपेड असा मुद्देमालही जप्त करण्यात आला. जप्त केलेल्या सर्व मुद्देमालाची एकूण किंमत २ लाख ६८ हजार १०० रुपये आहे.
या कारवाईत सुरज गोपाळराव कठाणे (वय ३०) आणि हर्षल विनोद अबगड (वय २५, दोघेही रा. नंदनवन झोपडपट्टी, आंबेडकर चौक परिसर, नागपूर) यांना ताब्यात घेण्यात आले आहे. या प्रकरणात आणखी एका आरोपीचा शोध घेतला जात आहे.
या प्रकरणी सक्करदरा पोलीस ठाण्यात एनडीपीएस कायदा १९८५ मधील कलम ८(क), २२(क) आणि २९ अन्वये गुन्हा नोंदविण्याची प्रक्रिया सुरू असल्याची माहिती अमली पदार्थविरोधी पथकाचे पोलीस निरीक्षक भारत क्षीरसागर यांनी दिली.
