धामणगावात सजला भव्य श्याम दरबार; हजारो श्यामप्रेमींची उपस्थिती

भक्तिमय वातावरणात रंगली भजन संध्या; भाविकांनी घेतला महाप्रसादाचा लाभ

धामणगाव रेल्वे | प्रतिनिधी संतोष वाघमारे : धामणगाव रेल्वे शहरात प्रथमच ‘दिवाने श्री श्याम के’ परिवाराच्या वतीने आयोजित करण्यात आलेला भव्य श्याम संकीर्तन सोहळा मोठ्या उत्साहात आणि भक्तिमय वातावरणात संपन्न झाला. K.G.T.I. खत्री जिनिंग, माहेश्वरी भवनच्या बाजूला आयोजित करण्यात आलेल्या या भव्य श्याम दरबाराला हजारो महिला, पुरुष, युवक-युवती आणि श्यामप्रेमींनी उपस्थिती लावली.

या सोहळ्यासाठी आकर्षक सजावट करून श्याम दरबाराचा भव्य स्वरूपात देखावा साकारण्यात आला होता. संपूर्ण परिसराला कलकत्त्यातील भक्तिमय वातावरणाची अनुभूती देणारी सजावट करण्यात आली होती. सायंकाळपासून सुरू झालेल्या भजन संध्येमुळे संपूर्ण परिसर भक्तिरसात न्हाऊन निघाला.

प्रसिद्ध भजन गायकांनी बांधली भक्तीची मैफल

भजन संध्येमध्ये कनिका ग्रोवर (नीमच), निहाल ठाकरान (कोलकाता), सोनम समता (दिल्ली), गीतांश डालमिया (नागपूर) तसेच नरेश पूनिया म्युझिकल ग्रुप (दिल्ली) यांनी श्यामभजनांचे सादरीकरण केले.

भजनांच्या सुरावटीवर उपस्थित श्यामप्रेमी भक्तिभावाने सहभागी झाले. विविध भक्तिगीते, संगीत आणि आध्यात्मिक वातावरणामुळे संपूर्ण परिसर श्याममय झाला. भाविकांनी मोठ्या उत्साहाने भजनांचा आनंद घेत बाबा श्यामच्या भक्तीत तल्लीन होण्याचा अनुभव घेतला.

हजारो भाविकांनी घेतला महाप्रसादाचा लाभ

कार्यक्रमासाठी आलेल्या श्यामप्रेमींसाठी आयोजकांच्या वतीने महाप्रसादाची विशेष व्यवस्था करण्यात आली होती. हजारो भाविकांनी महाप्रसादाचा लाभ घेतला.

या भव्य श्याम संकीर्तन सोहळ्याच्या यशस्वी आयोजनासाठी दिवाने श्याम के परिवारातील सदस्य आणि स्वयंसेवकांनी विशेष परिश्रम घेतले.

धामणगाव रेल्वे शहरात प्रथमच आयोजित करण्यात आलेल्या या भव्य श्याम संकीर्तनाला मिळालेल्या उत्स्फूर्त प्रतिसादामुळे शहरातील श्यामभक्तीचा उत्साह अधोरेखित झाला. भक्तिमय वातावरणात पार पडलेल्या या सोहळ्यामुळे उपस्थित भाविकांना अविस्मरणीय आध्यात्मिक अनुभव मिळाला.

सिटी न्यूज प्रतिनिधी — संतोष वाघमारे, धामणगाव रेल्वे