बडनेऱ्यात संत गोगा महाराज जयंतीचा भव्य जल्लोष

हजारो भाविकांचा निशाण शोभायात्रेत सहभाग; ढोल-ताशांचा गजर, विद्युत रोषणाई आणि सर्वधर्मीय सलोख्याने शहर दुमदुमले

बडनेरा | अमरावती

बडनेरा शहरात संत गोगा महाराज जयंतीचा भव्य आणि भक्तिमय जल्लोष पाहायला मिळाला. वाल्मिकी समाजाचे आराध्य दैवत संत गोगा महाराज यांच्या जयंतीनिमित्त काढण्यात आलेल्या भव्य निशाण शोभायात्रेत हजारो भाविक सहभागी झाले. ढोल-ताशांचा गजर, घोडे, डीजेचा दणदणाट आणि आकर्षक विद्युत रोषणाईने संपूर्ण बडनेरा शहर भक्तिमय वातावरणात न्हाऊन निघाले.

बडनेऱ्यातील माताफैल तिलक नगर परिसरातून संत गोगा महाराजांच्या प्रतिमेची भव्य निशाण शोभायात्रा काढण्यात आली. विद्युत रोषणाईने सजवण्यात आलेला आकर्षक रथ हे या शोभायात्रेचे प्रमुख आकर्षण ठरले. रथासमोर घोडे, पारंपरिक निशाणे आणि ढोल-ताशांच्या गजरात शेकडो महिला आणि पुरुष भाविक उत्स्फूर्तपणे सहभागी झाले.

संत गोगा महाराजांच्या जयघोषाने संपूर्ण परिसर दुमदुमून गेला. भाविकांमध्ये मोठा उत्साह पाहायला मिळत होता. पारंपरिक वेशभूषा, निशाणे आणि ढोल-ताशांच्या तालामुळे शोभायात्रेने शहरातील वातावरण भक्तिमय केले.

ही शोभायात्रा पाचबंगला रेल्वे उड्डाणपूल, समता चौक, जयहिंद चौक आणि चांदणी चौक मार्गे पुढे सरकली. शोभायात्रेच्या मार्गावर नागरिकांनी भाविकांचे उत्साहात स्वागत केले.

विशेष म्हणजे, या जयंती सोहळ्यात सर्वधर्मीय सामाजिक सलोख्याचे दर्शन घडले. विविध धर्मांच्या नागरिकांनी शोभायात्रेत सहभागी झालेल्या भाविकांसाठी पिण्याचे पाणी आणि फराळाचे वाटप केले. चांदणी चौक मित्र मंडळाच्या वतीने फराळी चिवडा आणि केळीचे वाटप करण्यात आले, तर समता चौकात स्वयंभू जगदंबा मरिमाता मंदिर ट्रस्टच्या वतीने पाण्याच्या बाटल्यांचे वितरण करण्यात आले.

या उपक्रमातून संत गोगा महाराजांच्या जयंती सोहळ्याला सामाजिक एकता आणि सर्वधर्मीय ऐक्याचा संदेश मिळाला. धार्मिक उत्सवासोबतच समाजातील बंधुभाव आणि सलोखा जपण्याचे चित्र यावेळी पाहायला मिळाले.

शोभायात्रेदरम्यान कोणताही अनुचित प्रकार घडू नये यासाठी पोलिसांचा चोख बंदोबस्त ठेवण्यात आला होता. वरिष्ठ पोलीस निरीक्षक हनमंत ऊरलगोंडावार, API प्रमोद इंगळे यांच्यासह पोलीस कर्मचारी मोठ्या संख्येने तैनात होते.

अखेर ही भव्य निशाण शोभायात्रा बडनेरा झोन क्रमांक चारच्या मनपा मैदानात पोहोचली. येथे भक्तिमय वातावरणात जयंती सोहळ्याचा समारोप करण्यात आला.

भक्तीचा उत्साह, सामाजिक एकता आणि सर्वधर्मीय सलोख्याचा संदेश देणाऱ्या या भव्य शोभायात्रेमुळे संत गोगा महाराजांच्या जयघोषाने बडनेरा शहर दुमदुमून गेले. राजतिलक श्याम बाबा मित्र मंडळासह समाजातील नागरिकांच्या अथक परिश्रमातून आयोजित करण्यात आलेला हा जयंती सोहळा अविस्मरणीय ठरला.