रामटेकमध्ये व्यसनमुक्तीचा संदेश; परमात्मा एक आनंदधामात भव्य सोहळा उत्साहात
महानत्यागी बाबा जुमदेवजी यांचा सत्कार; पदयात्रा, व्यसनमुक्ती जनजागृती आणि महाप्रसादाचे आयोजन
नागपूर जिल्ह्यातील रामटेक येथील परमात्मा एक आनंदधाम येथे भगवत कृपा षष्ठीच्या पूर्वप्रभातनिमित्त व्यसनमुक्त समाजनिर्मितीचा संदेश देणारा भव्य कार्यक्रम उत्साहात पार पडला. या कार्यक्रमात महानत्यागी बाबा जुमदेवजी यांच्या स्वागत व सत्कारासह व्यसनमुक्ती अभियान, सामाजिक एकोपा आणि अध्यात्मिक विचारांचा प्रसार करण्यात आला.
बुधवार, २ सप्टेंबर २०२६ रोजी आयोजित या कार्यक्रमाची सुरुवात परमात्मा एक आनंदधामचे मार्गदर्शक लक्ष्मण मेहर बाबूजी यांच्या मार्गदर्शनाखाली लंबे हनुमान मंदिर ते परमात्मा एक आनंदधाम अशी भव्य पदयात्रा काढून करण्यात आली. या पदयात्रेत मोठ्या संख्येने सेवक, सेविका आणि बाल गोपाल उत्स्फूर्तपणे सहभागी झाले.
आनंदधाम येथे पदयात्रेचे आगमन झाल्यानंतर दीपप्रज्वलन करून कार्यक्रमाचे उद्घाटन करण्यात आले. यानंतर मान्यवरांच्या हस्ते महानत्यागी बाबा जुमदेवजी यांचा सत्कार करण्यात आला. कार्यक्रमात व्यसनमुक्ती अभियान, सामाजिक प्रबोधन आणि समाजहिताच्या विविध विषयांवर चर्चासत्र आयोजित करण्यात आले. समाजातून व्यसनाचे उच्चाटन करण्यासाठी प्रत्येक नागरिकाने पुढाकार घ्यावा, असे आवाहन यावेळी करण्यात आले.
यावेळी विविध आकर्षक झांक्यांचे प्रदर्शनही सादर करण्यात आले. उत्कृष्ट झांक्यांना मान्यवरांच्या हस्ते पारितोषिके देऊन गौरविण्यात आले. तसेच आनंदधाम परिसरात सकाळपासून आयोजित करण्यात आलेल्या भव्य महाप्रसादाचा हजारो सेवक, सेविका आणि भाविकांनी लाभ घेतला.
रामटेकच्या परमात्मा एक आनंदधामात झालेल्या या कार्यक्रमातून व्यसनमुक्त समाजनिर्मिती, सामाजिक एकोपा आणि अध्यात्मिक विचारांचा प्रभावी संदेश देण्यात आला. सेवक, सेविका आणि बाल गोपालांच्या उत्स्फूर्त सहभागामुळे संपूर्ण परिसर भक्तिमय आणि उत्साहपूर्ण वातावरणाने भारावून गेला.
