पेसा वनरक्षक भरतीतील पात्र उमेदवारांचे आंदोलन तीव्र; नियुक्ती आदेशासाठी अर्धनग्न आंदोलन

अमरावतीत बेमुदत उपोषणाचा तिसरा दिवस; उद्यापर्यंत निर्णय न झाल्यास रस्ता रोकोचा इशारा

अमरावती | प्रतिनिधी

अमरावतीत पेसा वनरक्षक भरती २०२३ मधील पात्र उमेदवारांच्या प्रलंबित नियुक्ती आदेशाचा प्रश्न चिघळताना दिसत आहे. नियुक्ती आदेशासाठी सुरू असलेल्या बेमुदत आमरण उपोषणाचा आज तिसरा दिवस असून, प्रशासनाकडून अद्याप ठोस निर्णय न झाल्याने आंदोलक उमेदवारांनी अर्धनग्न आंदोलन करत संताप व्यक्त केला.

तिसऱ्या दिवशी आंदोलन तीव्र

मुख्य वनसंरक्षक कार्यालय, प्रादेशिक अमरावती येथे पात्र उमेदवारांकडून बेमुदत आमरण उपोषण सुरू आहे. पहिल्या दोन दिवसांत शांततेच्या मार्गाने मागण्या मांडल्यानंतरही ठोस निर्णय न झाल्याचा आरोप आंदोलकांनी केला.

त्यामुळे आंदोलनाच्या तिसऱ्या दिवशी उमेदवारांनी अर्धनग्न आंदोलन करत प्रशासनाचा निषेध नोंदवला.

नियुक्तीपत्राची मागणी

आंदोलकांच्या म्हणण्यानुसार, पात्र ठरूनही अनेक महिन्यांपासून नियुक्ती आदेशाची प्रतीक्षा करावी लागत आहे. संबंधितांकडून वारंवार आश्वासने मिळत असली तरी प्रत्यक्ष नियुक्ती आदेश मिळालेला नसल्याचे उमेदवारांचे म्हणणे आहे.

केवळ आश्वासने नकोत, तर प्रत्यक्ष नियुक्तीपत्र हातात द्यावे, अशी आक्रमक भूमिका आंदोलकांनी घेतली आहे.

नेमक्या काय आहेत मागण्या?

अमरावती आणि धुळे वनवृत्तातील पात्र उमेदवारांना तात्काळ नियुक्ती आदेश देण्यात यावेत, ही आंदोलकांची प्रमुख मागणी आहे.

तसेच गडचिरोली, चंद्रपूर, नाशिक आणि इतर वनवृत्तांप्रमाणे अमरावती आणि धुळे वनवृत्तातील पात्र उमेदवारांवरील कथित अन्याय दूर करावा, अशी मागणीही करण्यात आली आहे.

याशिवाय पेसा क्षेत्रातील माजी सैनिकांसाठी असलेली रिक्त पदे नियमानुसार पात्र उमेदवारांमधून भरण्यात यावीत, अशी मागणी आंदोलकांनी केली आहे.

निर्णय न झाल्यास रस्ता रोकोचा इशारा

दरम्यान, उद्यापर्यंत प्रशासनाने आंदोलनाची दखल घेऊन नियुक्तीचा प्रश्न मार्गी लावला नाही, तर आंदोलन आणखी तीव्र करण्याचा इशारा उमेदवारांनी दिला आहे. त्यानंतर मुख्य रस्त्यावर रस्ता रोको आंदोलन करण्याचा इशाराही देण्यात आला आहे.

जोपर्यंत प्रत्यक्ष नियुक्ती आदेश मिळत नाहीत, तोपर्यंत आमरण उपोषण मागे घेतले जाणार नाही, असा ठाम निर्धार आंदोलक उमेदवारांनी व्यक्त केला आहे.

आता प्रशासन आंदोलकांशी चर्चा करून नियुक्तीचा प्रश्न मार्गी काढते की आंदोलन आणखी तीव्र होते, याकडे अमरावतीचे लक्ष लागले आहे.