परतवाडा अश्लील व्हिडिओ प्रकरणात मोठी अपडेट; आठही आरोपींना सशर्त जामीन

मुख्य आरोपी मोहम्मद अयान तनवीर अहमदसह आठ जणांना दिलासा; अचलपूर न्यायालयात खटला सुरूच राहणार

परतवाडा | प्रतिनिधी

परतवाड्यातील बहुचर्चित अश्लील व्हिडिओ व्हायरल प्रकरणात मोठी कायदेशीर घडामोड समोर आली आहे. या प्रकरणातील मुख्य आरोपी मोहम्मद अयान तनवीर अहमद याच्यासह एकूण आठ आरोपींना न्यायालयाने सशर्त जामीन मंजूर केला आहे. मात्र, जामीन मिळाल्याने आरोपी निर्दोष ठरलेले नसून, या प्रकरणातील पुढील न्यायालयीन प्रक्रिया सुरूच राहणार आहे.

एप्रिलमध्ये प्रकरण आले होते समोर

१३ एप्रिल २०२६ रोजी हे प्रकरण समोर आल्यानंतर परतवाडा पोलीस ठाण्यात मोहम्मद अयान अहमद याच्यासह इतर आरोपींविरोधात गुन्हा दाखल करण्यात आला होता.

पोलिसांनी मोहम्मद अयान अहमद, उजेरखान, मोहम्मद साद, तबरेज खान, अफज खान, मानव सुगंधी, शेख नावेद आणि मोहम्मद इमरान या आठ जणांना अटक केली होती.

या प्रकरणाची सोशल मीडियावर मोठ्या प्रमाणात चर्चा झाली होती.

न्यायालयात दोन्ही बाजूंचा युक्तिवाद

आरोपींच्या जामीन अर्जावर अचलपूर जिल्हा व सत्र न्यायालय क्रमांक एकमध्ये सुनावणी झाली. आरोपींच्या वतीने पाच वकिलांनी न्यायालयात युक्तिवाद केला, तर सरकारी पक्षाने जामिनाला विरोध केला.

उपलब्ध साक्षी आणि पुराव्यांचा विचार केल्यानंतर न्यायालयाने आठही आरोपींना काही अटींसह जामीन मंजूर केला.

या प्रकरणातील आरोपी मानव सुगंधी याला यापूर्वी नागपूर उच्च न्यायालयातून जामीन मिळाल्याची माहिती आहे. तपासादरम्यान मानव सुगंधी याने अयानला अमरावती येथे फ्लॅट उपलब्ध करून दिल्याचा आरोप समोर आला होता.

न्यायालयीन लढाई अद्याप सुरू

आठही आरोपींना सशर्त जामीन मिळाला असला तरी या प्रकरणाची न्यायालयीन लढाई अद्याप संपलेली नाही. अचलपूर न्यायालयात खटला पुढे सुरू राहणार असून, साक्षी आणि उपलब्ध पुराव्यांच्या आधारे पुढील कायदेशीर प्रक्रिया पार पडणार आहे.

सरकारी सहाय्यक वकील अॅड. धनराज नवले यांनी याबाबत माहिती दिली आहे.

महत्त्वाचे म्हणजे, जामीन हा निर्दोषत्वाचा अंतिम निर्णय नसतो. या प्रकरणातील अंतिम सत्य न्यायालयीन सुनावणी आणि निर्णयानंतरच स्पष्ट होणार आहे.