कौटुंबिक वादातून पतीकडून ३७ वर्षीय पत्नीवर हल्ला; गंभीर भाजलेल्या महिलेवर घाटी रुग्णालयात उपचार, आरोपी पती फरार

बीड : पिंपळनेर येथे कौटुंबिक वाद आणि चारित्र्याच्या संशयातून पतीने आपल्या ३७ वर्षीय पत्नीवर पेट्रोल ओतून तिला पेटवून देण्याचा प्रयत्न केल्याची धक्कादायक घटना समोर आली आहे. या घटनेत अनुष्का शिरसट गंभीररीत्या भाजल्या असून त्यांच्यावर छत्रपती संभाजीनगर येथील घाटी रुग्णालयात उपचार सुरू आहेत. घटनेनंतर आरोपी पती मिलिंद शिरसट फरार झाला असून त्याचा शोध घेण्यासाठी पोलिसांकडून तपास सुरू आहे.

मारहाणीनंतर पेट्रोल ओतून पेटवण्याचा आरोप

मिळालेल्या माहितीनुसार, पिंपळनेर येथे कौटुंबिक वादातून पती-पत्नीमध्ये वाद झाला. चारित्र्याच्या संशयावरून पती मिलिंद शिरसट याने पत्नी अनुष्का यांना मारहाण केल्याचा आरोप आहे. यावेळी त्यांच्या मुलाने आईला वाचवण्याचा प्रयत्न करत वडिलांना मारहाण करू नका, अशी विनवणी केल्याचेही समोर आले आहे.

मात्र, परिस्थिती गंभीर होत गेली आणि आरोपीने पत्नीवर पेट्रोल ओतून तिला पेटवून दिल्याचा आरोप आहे. या घटनेत अनुष्का गंभीर भाजल्या. त्यांना उपचारासाठी रुग्णालयात दाखल करण्यात आले. प्रकृती गंभीर असल्याने पुढील उपचारासाठी त्यांना छत्रपती संभाजीनगर येथील घाटी रुग्णालयात हलवण्यात आले.

उपचारादरम्यान पोलिसांकडे जबाब

घाटी रुग्णालयात उपचार सुरू असताना अनुष्का शिरसट यांनी पोलिसांकडे आपला जबाब नोंदवला आहे. पतीकडून सातत्याने छळ केला जात असल्याचे त्यांनी जबाबात सांगितल्याची माहिती आहे. तसेच, आरोपी पतीला कठोर शिक्षा देण्याची मागणी त्यांनी पोलिसांकडे केली आहे.

घटनेनंतर आरोपी मिलिंद शिरसट फरार झाला असून त्याचा शोध घेण्यासाठी पिंपळनेर पोलीस तपास करत आहेत. पीडित महिलेचा जबाब नोंदवण्यात आला असून त्याआधारे पुढील कायदेशीर कारवाई सुरू असल्याची माहिती पिंपळनेर पोलिसांनी दिली.

या घटनेमुळे परिसरात खळबळ उडाली असून कौटुंबिक वादातून घडलेल्या या गंभीर प्रकाराची पोलिसांकडून सखोल चौकशी केली जात आहे.