दोन वर्षांपासून फरार महिला आरोपी नागपूर गुन्हे शाखेच्या जाळ्यात

गुप्त माहितीच्या आधारे लावा परिसरातून अटक; पुढील कायदेशीर कारवाई सुरू

नागपूर | प्रतिनिधी

दोन वर्षांहून अधिक काळ पोलिसांना गुंगारा देत राज्याबाहेर फरार असलेल्या एका महिला आरोपीला अखेर नागपूर गुन्हे शाखेने अटक करण्यात यश मिळवले आहे. गुप्त माहितीच्या आधारे लावलेल्या सापळ्यात ही कारवाई करण्यात आली असून आरोपीला पुढील कायदेशीर प्रक्रियेसाठी संबंधित पोलीस ठाण्याच्या ताब्यात देण्याची प्रक्रिया सुरू आहे.

नागपूर गुन्हे शाखेकडून फरार आरोपींच्या शोधासाठी विशेष मोहीम राबविण्यात येत असून, त्याच मोहिमेदरम्यान ही महत्त्वाची कारवाई करण्यात आली.

माहितीनुसार, २०२२ मध्ये कलमना पोलीस ठाण्यात दाखल झालेल्या एका गंभीर गुन्ह्यातील ही महिला आरोपी गुन्हा घडल्यानंतर नागपूर शहरातून फरार झाली होती. तपासादरम्यान या प्रकरणातील इतर आरोपींना न्यायालयाने निर्दोष मुक्त केले होते. मात्र, संबंधित महिला आरोपी आणि मुलाच्या वडिलांना दोषी ठरविण्यात आले होते. न्यायालयाने मुलाच्या वडिलांना जन्मठेपेची शिक्षा सुनावली होती, तर महिला आरोपी फरार असल्याने तिचा शोध सुरू होता.

गुन्हे शाखेला मिळालेल्या गोपनीय माहितीनुसार संबंधित महिला आरोपी लावा परिसरात येणार असल्याची माहिती मिळाली. त्यानुसार पोलिसांनी परिसरात सापळा रचून तिला शिताफीने ताब्यात घेतले.

आरोपीविरुद्ध पुढील कायदेशीर कारवाई सुरू असून तिला संबंधित पोलीस ठाण्याच्या ताब्यात देण्याची प्रक्रिया सुरू असल्याचे पोलिसांनी सांगितले.

ही कारवाई पोलीस आयुक्त विश्वास नागरे पाटील, सहपोलीस आयुक्त रवींद्र सिंघल, अपर पोलीस आयुक्त नवीनचंद्र रेड्डी, पोलीस उपायुक्त निकेतन कदम तसेच गुन्हे शाखेच्या वरिष्ठ अधिकाऱ्यांच्या मार्गदर्शनाखाली गुन्हे शाखा युनिट क्रमांक ३ च्या पथकाने यशस्वीरीत्या पार पाडली.

फरार आरोपींच्या शोधासाठी नागपूर पोलिसांची विशेष मोहीम सातत्याने सुरू असून, गंभीर गुन्ह्यांतील आरोपींना कायद्याच्या कचाट्यात आणण्याच्या दिशेने ही कारवाई महत्त्वाची मानली जात आहे.