नांदेड-लातूर महामार्गावरील पुलाचा भाग कोसळला
एसजीजीएस अभियांत्रिकी महाविद्यालयासमोरील घटना; सुदैवाने जीवितहानी टळली, कारणांचा तपास सुरू
नांदेड | प्रतिनिधी
नांदेड-लातूर राष्ट्रीय महामार्गावरील एसजीजीएस अभियांत्रिकी महाविद्यालयासमोरील पुलाचा एक भाग अचानक कोसळल्याची घटना घडली. सुदैवाने, घटना घडली त्यावेळी पुलाखाली किंवा परिसरात कोणतीही वाहतूक नसल्याने मोठी जीवितहानी टळली. या घटनेमुळे पुलाच्या बांधकामाच्या गुणवत्तेबाबत प्रश्न उपस्थित होत असून, संबंधित यंत्रणेकडून तपास सुरू करण्यात आला आहे.
मिळालेल्या माहितीनुसार, एसजीजीएस अभियांत्रिकी महाविद्यालयासमोरील पुलाचा एक भाग अचानक कोसळल्याने परिसरात खळबळ उडाली. हा परिसर शहरातील अत्यंत वर्दळीचा असून येथे एसजीजीएस अभियांत्रिकी महाविद्यालय तसेच शासकीय रुग्णालय असल्याने दिवसभर नागरिक आणि वाहनांची मोठ्या प्रमाणावर ये-जा असते.
मात्र, पूलाचा भाग कोसळला त्यावेळी त्या ठिकाणी कोणतीही व्यक्ती किंवा वाहन नसल्याने मोठी दुर्घटना टळली. अन्यथा गंभीर जीवित व वित्तहानी होण्याची शक्यता व्यक्त केली जात आहे.
घटनेनंतर पुलाच्या बांधकामाच्या दर्जाबाबत प्रश्न उपस्थित होऊ लागले आहेत. बांधकामातील त्रुटी, निष्काळजीपणा किंवा अन्य तांत्रिक कारणांमुळे हा प्रकार घडला का, याबाबत विविध स्तरांवर चर्चा सुरू असून, यासंदर्भात अधिकृत कारण अद्याप स्पष्ट झालेले नाही.
घटनेची माहिती मिळताच संबंधित यंत्रणेचे अधिकारी घटनास्थळी दाखल झाले. परिसराची पाहणी करून सुरक्षेच्या दृष्टीने आवश्यक उपाययोजना करण्यात आल्या असून, तांत्रिक तपास सुरू आहे.
दरम्यान, या घटनेचे नेमके कारण अधिकृत चौकशी अहवालानंतरच स्पष्ट होणार असून, तपासाच्या निष्कर्षानुसार पुढील कारवाई करण्यात येणार असल्याचे संबंधित सूत्रांनी सांगितले.
