नागपूर हादरले! सक्करदऱ्यात दुहेरी हत्याकांड; दोन तरुणांची दगडाने ठेचून निर्घृण हत्या
नागपूर | प्रतिनिधी
उपराजधानी नागपूर पुन्हा एकदा गुन्हेगारीच्या थरारक घटनेने हादरली आहे. शहरातील सक्करदरा पोलीस ठाण्याच्या हद्दीत बुधवारी रात्री घडलेल्या दुहेरी हत्याकांडाने संपूर्ण शहरात खळबळ उडाली आहे. अज्ञात हल्लेखोरांनी दोन तरुणांच्या डोक्यात दगडाने वार करून त्यांची निर्घृण हत्या केल्याची धक्कादायक घटना उघडकीस आली आहे.
माहितीनुसार, सक्करदरा पोलीस ठाण्याच्या हद्दीतील कमला नेहरू महाविद्यालयाजवळ बुधवारी रात्री हा थरारक प्रकार घडला. अज्ञात हल्लेखोरांनी दोन तरुणांवर जीवघेणा हल्ला करत त्यांच्या डोक्यात मोठ्या दगडाने प्रहार केले. या हल्ल्यात दोघांचाही जागीच मृत्यू झाल्याचा प्राथमिक अंदाज व्यक्त करण्यात येत आहे.
घटनेची माहिती मिळताच सक्करदरा पोलीस घटनास्थळी दाखल झाले. पोलिसांनी परिसराची नाकेबंदी करून तपासाला सुरुवात केली. मृतांपैकी एका तरुणाची ओळख आदित्य उर्फ सोनू बोंडवे अशी पटली असून दुसऱ्या मृत तरुणाची ओळख पटविण्याचे काम सुरू आहे.
घटनास्थळी फॉरेन्सिक पथकाने पाहणी करून महत्त्वाचे पुरावे संकलित केले आहेत. तसेच परिसरातील सीसीटीव्ही फुटेज, तांत्रिक पुरावे आणि स्थानिकांकडून मिळालेल्या माहितीद्वारे आरोपींचा शोध घेण्याचे काम युद्धपातळीवर सुरू आहे.
दुहेरी हत्याकांडामागील नेमके कारण अद्याप स्पष्ट झालेले नसले तरी वैयक्तिक वाद, जुने वैमनस्य किंवा इतर कोणता गुन्हेगारी अँगल आहे का, याचाही पोलीस तपास करत आहेत.
या दुहेरी हत्याकांडामुळे सक्करदरा परिसरासह संपूर्ण नागपूर शहरात भीती आणि चिंतेचे वातावरण निर्माण झाले असून नागरिकांमध्ये असुरक्षिततेची भावना वाढली आहे. आता या प्रकरणातील आरोपींना पोलीस किती लवकर अटक करतात आणि हत्येमागील नेमके कारण काय समोर येते, याकडे सर्वांचे लक्ष लागले आहे.
