बकरी ईदच्या पार्श्वभूमीवर नागपूर पोलिसांचा भव्य रूट मार्च; यशोधरा नगर-वनदेवी चौक परिसरात सुरक्षा वाढवली
येत्या सण-उत्सवांच्या आणि बकरी ईदच्या पार्श्वभूमीवर नागपूर पोलीस प्रशासन पूर्णपणे सतर्क झाले आहे. शहरातील कायदा आणि सुव्यवस्था अबाधित राखण्यासाठी परिमंडळ क्रमांक ५ अंतर्गत यशोधरा नगर आणि वनदेवी चौक परिसरात पोलिसांचा भव्य रूट मार्च काढण्यात आला.
आगामी सण-उत्सव आणि बकरी ईद शांततेत आणि सुरक्षित वातावरणात पार पडावेत यासाठी नागपूर पोलिसांनी विशेष तयारी सुरू केली आहे.
याच अनुषंगाने परिमंडळ ५ अंतर्गत येणाऱ्या यशोधरा नगर परिसर आणि वनदेवी चौक भागात पोलिसांनी भव्य रूट मार्चचे आयोजन केले.
या रूट मार्चचे नेतृत्व परिमंडळ ५ च्या पोलीस उपायुक्त आणि सहाय्यक पोलीस आयुक्त यांनी केले.
संचलनात विविध पोलीस ठाण्यांचे वरिष्ठ पोलीस निरीक्षक, सहाय्यक पोलीस निरीक्षक, पोलीस उपनिरीक्षक तसेच मोठ्या संख्येने पोलीस अधिकारी आणि कर्मचारी सहभागी झाले होते.
रूट मार्चदरम्यान संवेदनशील आणि गर्दीच्या भागांमधून पोलिसांनी संचलन करत नागरिकांमध्ये सुरक्षिततेची भावना निर्माण करण्याचा प्रयत्न केला.
तसेच कोणत्याही प्रकारच्या अफवा, चुकीची माहिती किंवा सोशल मीडियावरील भडक संदेशांवर विश्वास ठेवू नये, असे आवाहनही पोलिसांकडून करण्यात आले.
शहरातील शांतता, सलोखा आणि कायदा सुव्यवस्था कायम राखण्यासाठी नागरिकांनी पोलिसांना सहकार्य करावे, असेही प्रशासनाने स्पष्ट केले आहे.
आगामी सणांच्या पार्श्वभूमीवर नागपूर पोलीस प्रशासनाने सुरक्षा व्यवस्थेची चोख तयारी सुरू केल्याचे या रूट मार्चमधून दिसून आले. नागरिकांनीही जबाबदारीने वागून शांतता राखण्याचे आवाहन पोलिसांनी केले आहे.
