बडनेराच्या संभाजीनगरात छत्रपती संभाजी महाराज जयंती उत्साहात; आमदार रवी राणा यांच्या हस्ते भव्य स्मारकाचे अनावरण
अमरावती जिल्ह्यातील बडनेरा येथील संभाजीनगर परिसरात आज छत्रपती संभाजी महाराज जयंती मोठ्या उत्साहात आणि भक्तिभावात साजरी करण्यात आली. यानिमित्त उभारण्यात आलेल्या छत्रपती संभाजी महाराजांच्या भव्य स्मारकाचे अनावरण आमदार रवी राणा यांच्या हस्ते करण्यात आले. भगव्या ध्वजांनी सजलेला परिसर आणि जयघोषांनी भारलेले वातावरण यामुळे संपूर्ण परिसर शिवभक्तीने दुमदुमून गेला.
छत्रपती संभाजी महाराज मित्र मंडळाच्या वतीने आयोजित या कार्यक्रमाची सुरुवात स्मारकाच्या विधिवत पूजन आणि आरतीने झाली. ढोल-ताशांच्या गजरात आणि “छत्रपती संभाजी महाराज की जय”च्या घोषणांमध्ये नागरिकांनी महाराजांना अभिवादन केले.
या कार्यक्रमाला नगरसेवक अजय जयस्वाल, रजनी डोंगरे, वरिष्ठ पोलीस निरीक्षक सुनील चव्हाण, पोलीस उपनिरीक्षक अतुल इंगोले यांच्यासह अनेक मान्यवर उपस्थित होते. मित्र मंडळाचे पदाधिकारी, कार्यकर्ते आणि स्थानिक नागरिकांनी मोठ्या संख्येने उपस्थित राहून कार्यक्रमाला उत्स्फूर्त प्रतिसाद दिला.
उपस्थित मान्यवरांचा पुष्पगुच्छ देऊन सत्कार करण्यात आला. यावेळी बोलताना आमदार रवी राणा यांनी छत्रपती संभाजी महाराजांचे शौर्य, त्याग आणि हिंदवी स्वराज्यासाठीचे योगदान हे तरुण पिढीसाठी प्रेरणादायी असल्याचे सांगितले. तसेच नव्याने निवडून आलेल्या नगरसेवकांनी नागरिकांच्या समस्या तत्परतेने सोडवून विकासकामांना गती द्यावी, असे आवाहनही त्यांनी केले.
कार्यक्रमाचे प्रभावी सूत्रसंचालन प्रा. अमोल मिलके यांनी केले. त्यांच्या ओघवत्या निवेदनामुळे कार्यक्रमाला विशेष रंगत प्राप्त झाली.
या भव्य कार्यक्रमामुळे संभाजीनगर परिसरात भक्ती, उत्साह आणि इतिहासाबद्दलचा अभिमान यांचे अनोखे वातावरण निर्माण झाले. छत्रपती संभाजी महाराजांच्या विचारांचा वारसा पुढील पिढीपर्यंत पोहोचवण्याचा संदेश यावेळी देण्यात आला.
