बडनेऱ्यात जयहिंद चौकातील हॉटेलचे कुलूप तोडून ७ हजारांची चोरी

अज्ञात चोरट्यांचा गजबजलेल्या परिसरात धाडसी कारनामा; व्यापाऱ्यांमध्ये चिंतेचे वातावरण

बडनेरा : शहरातील गजबजलेल्या जयहिंद चौक परिसरात चोरीची घटना समोर आली आहे. येथील हॉटेल शिवशंकरचे शटर आणि कुलूप तोडून अज्ञात चोरट्यांनी गल्ल्यातील अंदाजे ७ हजार रुपयांची रोकड लंपास केल्याची घटना शुक्रवारी मध्यरात्रीच्या सुमारास घडल्याची माहिती आहे. या घटनेमुळे परिसरातील व्यापारी वर्गात चिंतेचे वातावरण निर्माण झाले आहे.

हॉटेल शिवशंकरचे संचालक नामचंद मुलानी यांनी दिलेल्या माहितीनुसार, ते नेहमीप्रमाणे शुक्रवारी रात्री सुमारे ११ वाजता हॉटेल बंद करून घरी गेले होते. शनिवारी सकाळी सुमारे ७ वाजता हॉटेल उघडण्यासाठी आले असता त्यांना दुकानाच्या शटरचे कुलूप तोडलेले दिसले.

चोरट्यांनी हॉटेलच्या शटरवरील तीन्ही कुलूप तोडल्याचे त्यांच्या निदर्शनास आले. घटनास्थळाजवळ सुमारे तीन ते चार फूट लांबीची लोखंडी सळईही आढळून आल्याने, या सळईचा वापर कुलूप तोडण्यासाठी करण्यात आला असावा, अशी शक्यता व्यक्त केली जात आहे.

यानंतर मुलानी यांनी हॉटेलमध्ये जाऊन गल्ल्याची पाहणी केली असता, गल्ल्यात ठेवलेली अंदाजे ७ हजार रुपयांची रोकड गायब असल्याचे त्यांच्या लक्षात आले. त्यामुळे अज्ञात चोरट्यांनी कुलूप तोडून हॉटेलमध्ये प्रवेश करत रोकड लंपास केल्याचे स्पष्ट झाले.

तक्रार नोंदविण्याबाबत प्रश्नचिन्ह

घटनेनंतर हॉटेल संचालक नामचंद मुलानी हे तक्रार दाखल करण्यासाठी सकाळी पोलीस ठाण्यात गेले होते. मात्र, त्यांच्या म्हणण्यानुसार, पोलिसांकडून आम्ही चौकशीसाठी घटनास्थळी येतो, असे सांगण्यात आले. वृत्त लिहीपर्यंत या प्रकरणी पुढील अधिकृत कारवाईबाबत स्पष्ट माहिती उपलब्ध झाली नव्हती.

गजबजलेल्या जयहिंद चौक परिसरात घडलेल्या या चोरीच्या घटनेमुळे व्यापाऱ्यांमध्ये असुरक्षिततेची भावना निर्माण झाली आहे. रात्रीच्या वेळी व्यापारी प्रतिष्ठाने बंद झाल्यानंतर त्यांच्या सुरक्षेचा प्रश्न पुन्हा एकदा ऐरणीवर आला आहे.

पोलिस तपासाकडे सर्वांचे लक्ष

या चोरीच्या घटनेमागे नेमके कोण आहे, परिसरातील सीसीटीव्ही कॅमेऱ्यांमध्ये संशयितांची हालचाल कैद झाली आहे का आणि चोरीसाठी कोणत्या पद्धतीचा वापर करण्यात आला, याचा तपास झाल्यानंतरच अधिक माहिती समोर येणार आहे.

व्यापारी वर्गाने परिसरात रात्रीची गस्त वाढवावी आणि चोरीच्या घटनांवर आळा घालण्यासाठी पोलिसांनी प्रभावी उपाययोजना कराव्यात, अशी मागणी होत आहे.

बडनेऱ्यातील गजबजलेल्या जयहिंद चौकात हॉटेलचे कुलूप तोडून चोरी झाल्याने व्यापाऱ्यांमध्ये चिंता वाढली असून, आता या प्रकरणातील अज्ञात चोरट्यांचा शोध घेण्यात पोलिसांना कधी यश येते, याकडे सर्वांचे लक्ष लागले आहे.