अमरावतीत मध्यरात्री जुगार अड्ड्यावर पोलिसांचा धाडसी छापा; २० जण ताब्यात, ६.९२ लाखांचा मुद्देमाल जप्त

अमरावती शहरात मध्यरात्री पोलिसांनी टाकलेल्या धडक छाप्याने चांदनी चौक परिसरात एकच खळबळ उडाली. रात्रीचा एक वाजलेला… सगळीकडे काळोख आणि शांतता… पण हातीपूरा परिसरातील चांदनी चौकात लाखोंचा जुगार रंगात आला होता. मात्र, पोलिसांच्या सायरनने क्षणातच सगळा खेळ उद्ध्वस्त झाला.

मिळालेल्या माहितीनुसार, अमरावती शहरातील नागपुरी गेट पोलीस स्टेशन हद्दीतील हातीपूरा, चांदनी चौक परिसरात मोठ्या प्रमाणावर जुगार अड्डा सुरू असल्याची गोपनीय माहिती पोलिसांना मिळाली होती. या माहितीच्या आधारे पोलिस आयुक्त राकेश ओला यांच्या आदेशानुसार विशेष कारवाईचे नियोजन करण्यात आले.

गाडगेनगर पोलीस स्टेशनचे निरीक्षक गोरखनाथ जाधव यांच्या नेतृत्वाखाली हे विशेष ऑपरेशन राबविण्यात आले. या कारवाईत तब्बल ५० हून अधिक पोलीस कर्मचारी सहभागी झाले होते. रात्री साधारण १ वाजताच्या सुमारास पोलिसांनी जुगार अड्ड्यावर थेट छापा टाकला आणि क्षणातच संपूर्ण परिसर पोलिसांनी वेढला.

अचानक झालेल्या या कारवाईने जुगार खेळणाऱ्यांमध्ये एकच गोंधळ उडाला. काहींनी पळून जाण्याचा प्रयत्न केला, मात्र पोलिसांनी वेगाने हालचाल करत २० आरोपींना ताब्यात घेतले.

या कारवाईत पोलिसांनी २ लाख १० हजार रुपयांची रोख रक्कम, २१ मोबाईल फोन आणि इतर साहित्य असा एकूण ६ लाख ९२ हजार रुपयांचा मुद्देमाल जप्त केला आहे.

या धडक कारवाईनंतर आणखी एक महत्त्वाची बाब चर्चेत आली आहे. नागपुरी गेट पोलीस स्टेशनच्या हद्दीत सुरू असलेल्या जुगार अड्ड्यावर कारवाई मात्र दुसऱ्या पोलीस ठाण्याच्या निरीक्षकांनी केल्याने स्थानिक पोलिसांच्या कार्यपद्धतीवर प्रश्नचिन्ह निर्माण झाले आहे.

छाप्यादरम्यान चांदनी चौक परिसरात मोठा पोलीस बंदोबस्त पाहून नागरिकांचीही मोठी गर्दी जमली होती. अचानक सुरू झालेल्या या कारवाईने परिसरात काही काळ तणावाचे वातावरण निर्माण झाले होते.

या धडक कारवाईनंतर जुगार अड्डे चालवणाऱ्यांमध्ये भीतीचे वातावरण निर्माण झाले असून, अमरावती पोलिसांनी स्पष्ट संदेश दिला आहे की, “रात्रीचा अंधार असला तरी कायद्याची नजर कायम जागी असते… आणि कायद्यापासून कोणीही सुटणार नाही.”

अमरावती पोलिसांच्या या कारवाईचे सर्वत्र कौतुक होत असून, शहरातील बेकायदेशीर धंद्यांवर पोलिसांनी आणखी कठोर कारवाई करावी, अशी मागणी नागरिकांकडून होत आहे.