अमरावतीत गुप्तधनाच्या हव्यासापायी अघोरी विधी; कारेगाव शिवारात सहा जण रंगेहात अटकेत

अमरावती जिल्ह्यात गुप्तधनाच्या हव्यासापायी अंधश्रद्धेचा कळस गाठणारी धक्कादायक घटना समोर आली आहे. कारेगाव शिवारात मध्यरात्री अघोरी विधी करत असलेल्या सहा जणांच्या टोळीचा वडगाव जंगल पोलिसांनी पर्दाफाश केला असून, जादूटोण्याच्या माध्यमातून जमिनीत दडलेले गुप्तधन मिळवण्याचा प्रयत्न करणाऱ्या आरोपींना रंगेहात अटक करण्यात आली आहे.

मिळालेल्या माहितीनुसार, वडगाव जंगल पोलीस ठाण्याचे पथक रात्री गस्त घालत असताना वरुड–कारेगाव मार्गावर एक संशयास्पद महिंद्रा XUV उभी असल्याचे त्यांच्या निदर्शनास आले. मध्यरात्री निर्जन ठिकाणी उभ्या असलेल्या वाहनामुळे पोलिसांना संशय आला आणि त्यांनी तात्काळ वाहनाची तपासणी सुरू केली.

वाहनात बसलेल्या सहा जणांनी सुरुवातीला पोलिसांना उडवाउडवीची उत्तरे देत दिशाभूल करण्याचा प्रयत्न केला. मात्र पोलिसांनी सखोल झडती घेतली असता, वाहनातून अंधश्रद्धा आणि जादूटोण्याशी संबंधित धक्कादायक साहित्य जप्त करण्यात आले.

जप्त साहित्यामध्ये काळ्या कापडाच्या बाहुल्या, खिळे, त्रिशूल, केस, सुया, लिंबू आणि अघोरी विधींमध्ये वापरली जाणारी इतर संशयास्पद साधने आढळून आली. हे साहित्य पाहून पोलिसांनी आरोपींची कसून चौकशी केली असता, जमिनीत गाडलेले गुप्तधन मिळवण्यासाठी ते अघोरी विधी करत असल्याची कबुली आरोपींनी दिली.

या कारवाईदरम्यान पोलिसांनी सुमारे ३ लाख रुपये किमतीचे चारचाकी वाहन आणि अघोरी विधीसाठी वापरले जाणारे इतर साहित्य जप्त केले आहे.

या प्रकरणी अशोक राठोड, रितेश भगत, लिलेश्वर बावणे, कुंदन राठोड, विरेंद्र गायकवाड आणि राजेश राठोड यांच्याविरोधात महाराष्ट्र नरबळी आणि अघोरी प्रथा प्रतिबंध कायद्यांतर्गत गुन्हा दाखल करण्यात आला आहे.

ठाणेदार विकास दांडे यांच्या मार्गदर्शनाखाली ही कारवाई करण्यात आली असून, या प्रकरणाचा पुढील तपास सुरू आहे.

या घटनेमुळे परिसरात संतापाची लाट उसळली असून, २१ व्या शतकातही गुप्तधनाच्या हव्यासापायी लोक अंधश्रद्धेच्या जाळ्यात अडकत असल्याची गंभीर बाब पुन्हा समोर आली आहे.

गुप्तधनाच्या मोहापायी अंधश्रद्धा, जादूटोणा आणि अघोरी प्रथांकडे वळणं केवळ बेकायदेशीरच नाही, तर समाजासाठी अत्यंत घातक आहे. विज्ञाननिष्ठ विचार, जागरूकता आणि कायद्याचा आदर हाच अशा प्रवृत्तींना आळा घालण्याचा प्रभावी मार्ग ठरू शकतो.