पुसदमध्ये अवकाळी पावसाचा तडाखा; झाडे कोसळली, संपूर्ण शहराचा वीजपुरवठा खंडित
पुसद शहरात सोमवारी रात्री अवकाळी पावसाने अक्षरशः धुमाकूळ घातला. जोरदार वाऱ्यासह झालेल्या मुसळधार पावसामुळे शहरातील अनेक भागांत मोठमोठी झाडे कोसळली असून, संपूर्ण शहराचा वीजपुरवठा खंडित झाला आहे. त्यामुळे नागरिकांना संपूर्ण रात्र अंधारात काढावी लागली.
रात्री अचानक वातावरणात बदल होत वादळी वाऱ्यासह पावसाला सुरुवात झाली. काही वेळातच पावसाचा जोर वाढला आणि शहरातील विविध भागांत झाडे उन्मळून पडू लागली. अनेक ठिकाणी झाडे रस्त्यावर कोसळल्याने वाहतुकीलाही अडथळा निर्माण झाला. काही भागांत वाहनांची ये-जा काही काळ ठप्प झाली होती.
या पावसाचा सर्वाधिक फटका वीजपुरवठ्याला बसला. कोसळलेल्या झाडांमुळे वीजतारा आणि खांबांचे नुकसान झाले. परिणामी, शहरातील वीजपुरवठा रात्रीपासून पूर्णपणे खंडित झाला. अचानक अंधार पसरल्याने नागरिकांमध्ये भीतीचे वातावरण निर्माण झाले. उष्णतेच्या वातावरणात वीज नसल्यामुळे नागरिकांना मोठा त्रास सहन करावा लागला.
अनेक भागांत घरांचे पत्रे उडणे, झाडांच्या फांद्या तुटणे आणि किरकोळ मालमत्तेचे नुकसान झाल्याच्या घटनाही समोर आल्या आहेत. सुदैवाने या घटनेत कोणतीही जीवितहानी झाल्याची माहिती नाही.
दरम्यान, प्रशासन, अग्निशमन दल आणि वीज वितरण कंपनीच्या कर्मचाऱ्यांनी तातडीने घटनास्थळी धाव घेतली असून, रस्त्यांवरील झाडे हटवण्याचे आणि वीजपुरवठा सुरळीत करण्याचे काम युद्धपातळीवर सुरू आहे.
अवकाळी पावसामुळे निर्माण झालेल्या या परिस्थितीमुळे पुसदकरांना मोठा त्रास सहन करावा लागला आहे. आता वीजपुरवठा कधी पूर्ववत होतो आणि प्रशासन किती लवकर परिस्थिती नियंत्रणात आणते, याकडे नागरिकांचे लक्ष लागले आहे.
