यवतमाळ हादरलं! पुसदसह अनेक भागात भूकंपाचे सौम्य धक्के; सुदैवाने हानी नाही
यवतमाळ : जिल्ह्यात आज अचानक भूकंपाचे सौम्य धक्के जाणवल्याने नागरिकांमध्ये काही काळ भीतीचे वातावरण निर्माण झाले. पुसद, वसंतनगर आणि आसपासच्या भागात हे धक्के जाणवले असून, अनेक नागरिक खबरदारी म्हणून घराबाहेर पडले.
मिळालेल्या माहितीनुसार, हिंगोली जिल्ह्यात रिश्टर स्केलवर ४.७ तीव्रतेचा भूकंप नोंदवण्यात आला. याचेच सौम्य धक्के यवतमाळ जिल्ह्यातही जाणवले. काही सेकंदांसाठी जमिनीला हलकासा कंप जाणवला, त्यामुळे नागरिकांमध्ये घबराट पसरली.
धक्के जाणवताच अनेकांनी घराबाहेर येत मोकळ्या जागेत आश्रय घेतला. मात्र, सुदैवाने या घटनेत कोणतीही जीवितहानी किंवा मालमत्तेचे नुकसान झाल्याची माहिती समोर आलेली नाही.
दरम्यान, प्रशासन आणि आपत्ती व्यवस्थापन विभागाने तात्काळ परिस्थितीचा आढावा घेत सर्व यंत्रणा सतर्क केल्या आहेत. नागरिकांनी अफवांवर विश्वास न ठेवता शांतता राखावी, असे आवाहन प्रशासनाकडून करण्यात आले आहे.
तसेच, भूकंपाचे धक्के जाणवल्यास इमारतीबाहेर मोकळ्या जागेत जावे आणि सुरक्षिततेच्या नियमांचे पालन करावे, असेही प्रशासनाने स्पष्ट केले आहे.
सुदैवाने या भूकंपात कोणतीही हानी झाली नाही, मात्र अशा नैसर्गिक घटनांवेळी सतर्क राहणे अत्यंत आवश्यक असल्याचे पुन्हा एकदा अधोरेखित झाले आहे.
