अमरावती राममय; भव्य शोभायात्रांमधून रामनवमीचा जल्लोष
अमरावती :
“जय श्रीराम”च्या गजरात अमरावती शहर आज अक्षरशः राममय झाल्याचं चित्र पाहायला मिळालं. रामनवमी निमित्त काढण्यात आलेल्या भव्य शोभायात्रा, ढोल-ताशांचा गजर, आकर्षक झांक्या आणि हजारोंच्या उपस्थितीमुळे शहरात उत्साहाचं वातावरण निर्माण झालं.
गुरुवार, २६ मार्च रोजी प्रभू श्रीराम जन्मोत्सव देशभरात मोठ्या उत्साहात साजरा करण्यात आला. अमरावती शहरातही विविध मंडळांच्या वतीने हा सण भक्तीभावाने आणि जल्लोषात साजरा करण्यात आला. विशेषतः विश्व हिंदू परिषद, बजरंग दल आणि हमालपुरा परिसराच्या वतीने भव्य शोभायात्रांचे आयोजन करण्यात आले होते.
या शोभायात्रांमध्ये आकर्षक झांक्या, रामायणावर आधारित देखावे, पालखी, दिंडी, तसेच डीजे आणि ढोल-ताशांच्या गजराने वातावरण भारावून गेले होते. प्रभू श्रीरामांच्या प्रतिमा आणि “जय श्रीराम”च्या घोषणांनी संपूर्ण शहर दुमदुमून गेले.
शहरातील विविध भागातून निघालेल्या शोभायात्रा अखेर राजकमल चौकात एकत्र आल्या, जिथे नागरिकांची मोठी गर्दी पाहायला मिळाली. कोणताही अनुचित प्रकार घडू नये यासाठी अमरावती पोलिसांकडून चोख बंदोबस्त ठेवण्यात आला होता.
एकूणच, यंदा रामनवमीचा उत्सव दरवर्षीपेक्षा अधिक उत्साहात साजरा झाल्याचे दिसून आले.
भक्ती, एकता आणि उत्साहाचा सुंदर संगम या सोहळ्यात पाहायला मिळाला असून, हा उत्सव सामाजिक एकतेचा संदेश देऊन गेला.
