अमरावतीत धोकादायक केबल्स हटविण्याची मोहीम; महानगरपालिकेची कारवाई सुरू
अमरावती शहरातील वाढत्या अपघातांच्या पार्श्वभूमीवर महानगरपालिकेकडून धोकादायक व निष्क्रिय केबल्स हटविण्याची विशेष मोहीम सुरू करण्यात आली आहे. विशेषतः कॉटन मार्केट ते इर्विन चौक या प्रमुख मार्गावर ही कारवाई करण्यात आली.
महानगरपालिकेच्या पथकाने शहरातील प्रमुख रस्ते, चौक आणि रहिवासी भागांमध्ये पाहणी करत लोंबकळणाऱ्या व वापरात नसलेल्या केबल्स हटविल्या. अनेक ठिकाणी या केबल्स झाडांवर, वीज खांबांवर आणि इमारतींवर अव्यवस्थितपणे टांगलेल्या आढळल्या होत्या, ज्यामुळे अपघाताचा धोका निर्माण झाला होता.
अधिकाऱ्यांच्या माहितीनुसार, काही केबल ऑपरेटर आणि इंटरनेट सेवा पुरवठादारांकडून नियमांचे पालन होत नसल्याचे दिसून आले आहे. संबंधितांना नोटिसा देण्यात येणार असून, भविष्यात नियमभंग झाल्यास दंडात्मक कारवाई करण्यात येणार आहे.
महानगरपालिकेने नागरिकांनाही सहकार्याचे आवाहन करत, ज्या ठिकाणी धोकादायक किंवा निष्क्रिय केबल्स दिसतील त्याची माहिती प्रशासनाला देण्यास सांगितले आहे.
या मोहिमेमुळे शहरातील रस्ते अधिक सुरक्षित आणि सुबक होण्यास मदत होणार आहे… पुढील काही दिवसांत ही कारवाई अधिक व्यापक करण्यात येणार असल्याची माहिती महानगरपालिकेकडून देण्यात आली आहे…
