नरेंद्र मोदींनी मोडला इंदिरा गांधींचा रेकॉर्ड; सर्वाधिक काळ PM पदावर राहणारे ठरले दुसरे नेते, पहिल्या नंबरवर कोण?
नवी दिल्ली : पंतप्रधान नरेंद्र मोदी सर्वाधिक काळ भारताचं पंतप्रधानपद भूषवणारे दुसरे नेते ठरले आहेत. माजी पंतप्रधान दिवंगत इंदिरा गांधी यांचा रेकॉर्ड त्यांनी स्वत:च्या नावे केला आहे. ते भारताचे दुसरे सर्वात जास्त काळ सेवा देणारे पंतप्रधान ठरले आहेत.
इंदिरा गांधी यांनी १४ जानेवारी १९८० ते ३१ ऑक्टोबर १९८४ या काळातही पंतप्रधान म्हणून काम केले होते. तर मोदी सन २६ मे २०१४ पासून या पदावर आहेत. एका अधिकाऱ्याने सांगितले की, मोदी हे भारतातील एकमेव नेते आहेत, ज्यांनी गुजरात विधानसभा निवडणुकीत २००२, २००७ आणि २०१२ मध्ये आणि राष्ट्रीय निवडणुकांमध्ये २०१४, २०१९ आणि २०२४ मध्ये सलग सहा निवडणुका जिंकल्या आहेत. देशाचे पहिले पंतप्रधान जवाहरलाल नेहरू यांनी सर्वाधिक काळ म्हणजेच, १५ ऑगस्ट १९४७ ते २७ मे १९६४ पर्यंत १६ वर्षे आणि २८६ दिवस पंतप्रधानपद भूषवले होते.
भाजपने एक्सवर यासंबंधी पोस्ट केली, त्यात त्यांनी म्हटले आहे की, “पंतप्रधान नरेंद्र मोदी यांनी एक विक्रम केला आहे. आज २५ जुलै २०२५ रोजी, पंतप्रधान नरेंद्र मोदी सलग ४,०७८ दिवसांच्या कार्यकाळात पूर्ण करतील, अधिकृतपणे भारताच्या इतिहासातील दुसरे सर्वात जास्त काळ पंतप्रधान राहिलेले पंतप्रधान बनतील, इंदिरा गांधी (१९६६ ते १९७७ पर्यंत ४,०७७ दिवस) यांना मागे टाकलं.”
आता पंडित नेहरुंशी स्पर्धा?
पंडित नेहरुंनी १९५२ ते १९६४पर्यंत भारताचे पंतप्रधानपद भूषवले. नरेंद्र मोदी यांनी पंतप्रधानपद स्वीकारण्यापूर्वी गुजरातचे मुख्यमंत्रीपदही सांभाळले आहे. ते १३ वर्षे गुजरातचे मुख्यमंत्री होते. ज्या पद्धतीने मोदी त्यांच्या जबाबदाऱ्या सांभाळत आहेत, त्यामुळे ते लवकरच नेहरूंना मागे टाकतील असे चित्र दिसत आहे. असे झाल्यास मोदी हे सर्वात जास्त काळ पंतप्रधानपद भूषवणारे भारताचे पहिले पंतप्रधान ठरतील. ही नक्कीच भाजपसाठी एक मोठी कामगिरी असेल.
