अमरावतीत धार्मिकतेचा जागर! साहू नगरमध्ये हनुमंत जिर्णोद्धार, प्राणप्रतिष्ठा व कलशारोहण सोहळा उत्साहात पार

अमरावती: अमरावतीच्या अकोली रोडवरील साहू नगर परिसरात आज धार्मिकतेचा जागर अनुभवायला मिळाला! परिसरातील नागरिकांच्या सहभागातून ‘हनुमंत जिर्णोद्धार, श्री गणपती प्राणप्रतिष्ठा व कलशारोहण महोत्सव 2025’ उत्साहात आणि भक्तिभावात पार पडला. विविध धार्मिक विधी आणि श्रद्धेच्या वातावरणात या कार्यक्रमाचं आयोजन करण्यात आलं होतं.

धार्मिक विधींची शिस्तबद्ध पारंपरिक साखळी

या पवित्र कार्यक्रमाची सुरुवात सकाळी 7 वाजता स्थापित देवतेच्या पूजनाने झाली. त्यानंतर अग्नि स्थापना, नवग्रह पूजन, मूर्तीचा जलाधिवास व दशविधी स्नान आदी विधी पार पडले. दुपारी 12:30 वाजता हनुमंत मूर्तीची प्रतिष्ठापना, महाअभिषेक, बलिदान व पुनराहुती यांसारख्या धार्मिक विधींनी वातावरण अधिकच भक्तिमय केलं.

कलश पूजन आणि भक्तिभावाची अनुभूती

श्री सीतारामजी महाराज संकटमोचन हनुमान मंदिर, रविनगर यांच्या वतीने पार पडलेल्या कलश पूजन आणि कलशारोहण सोहळ्याने सर्वांची श्रद्धा अधिक दृढ केली. यावेळी ह.भ.प. पांडुरंग कट्यारमल महाराज व त्यांच्या भजन मंडळाच्या सादरीकरणाने संपूर्ण परिसर भक्तिभावात रंगून गेला.

समाजहित आणि एकतेचा संदेश

या सोहळ्यात सौ. ललिता ताई कूरवाळे, श्री बीजवे, श्री अरुण हांडे, श्री अमोल चौधरी, सौ. सानप ताई, श्री गंगासिंग ठाकूर, श्री गोविंद राऊत आणि परिसरातील अनेक मान्यवरांनी सहभाग घेतला. जय भोले मंडळाच्या समन्वयातून हा धार्मिक सोहळा यशस्वीरीत्या पार पडला. कार्यक्रमाची सांगता महाआरती आणि महाप्रसादाने झाली, जिथे चारशेहून अधिक श्रद्धाळूंनी उपस्थित राहून धर्मभावना जागवली.