Accident NewscitynewsMaharashtraNagpurNagpurPolice

इंदोरा परिसरात भरधाव बलेनोची ॲक्टिव्हाला समोरून धडक; मायलेकी जखमी

पॉलिटेक्निकच्या प्रथम वर्षातील विद्यार्थिनीसह आईला दुखापत; निष्काळजी कारचालकाविरोधात जरीपटका पोलिसांत गुन्हा दाखल

नागपूर : शहरातील इंदोरा परिसरात भरधाव बलेनो कारने ॲक्टिव्हा दुचाकीला समोरून जोरदार धडक दिल्याची घटना घडली आहे. या अपघातात दुचाकीवरून प्रवास करणारी पॉलिटेक्निकच्या प्रथम वर्षात शिक्षण घेणारी विद्यार्थिनी आणि तिची आई अशा दोघी मायलेकी जखमी झाल्या आहेत. १५ नोव्हेंबर २०२६ रोजी रात्री साडेआठच्या सुमारास हा अपघात घडला. या प्रकरणी जरीपटका पोलिसांनी बलेनो कारचालकाविरोधात गुन्हा दाखल केला आहे.

पोलिसांनी दिलेल्या माहितीनुसार, संबंधित विद्यार्थिनी १५ नोव्हेंबरच्या रात्री आपल्या ॲक्टिव्हा दुचाकीवरून जात होती. तिच्या मागील सीटवर तिची आई बसली होती. दरम्यान, इंदोरा परिसरातून प्रवास करत असताना समोरून येणाऱ्या बलेनो कारचालकाने निष्काळजीपणे आणि भरधाव वेगाने वाहन चालवत त्यांच्या दुचाकीला जोरदार धडक दिली. या धडकेमुळे दोघीही जखमी झाल्या. त्यांच्या हातापायांना मार लागल्याची माहिती समोर आली आहे.

या घटनेनंतर जरीपटका पोलीस ठाण्यात अपराध क्रमांक ८७०/२६ अन्वये गुन्हा नोंदविण्यात आला आहे. निष्काळजीपणे वाहन चालवून अपघात घडविल्याप्रकरणी कारचालकाविरोधात भारतीय न्याय संहितेच्या कलम २८१, १२५(अ) तसेच मोटार वाहन कायद्याच्या कलम १३४, १७७ आणि १८४ अन्वये कारवाई करण्यात आली आहे.

जरीपटका पोलीस ठाण्याचे एपीआय पांडुरंग जाधव यांनी या घटनेला दुजोरा दिला आहे. शहरातील वाढते अपघात आणि वाहनचालकांचा निष्काळजीपणा पुन्हा एकदा चर्चेत आला असून, या प्रकरणाचा पुढील तपास जरीपटका पोलीस करीत आहेत.

Show More

Related Articles

Leave a Reply

Your email address will not be published. Required fields are marked *

Back to top button