मुखेड दुष्काळी यादीतून वगळल्याने शेतकरी आक्रमक; शासनाच्या जीआरची होळी
करपलेले सोयाबीन हातात घेऊन बोरगावात आंदोलन; आमदार तुषार राठोडांविरोधातही घोषणाबाजी
नांदेड : मुखेड तालुक्याचा दुष्काळी यादीत समावेश करण्यात न आल्याने शेतकऱ्यांमध्ये तीव्र नाराजी निर्माण झाली आहे. याच पार्श्वभूमीवर मुखेड तालुक्यातील बोरगाव येथे नुकसानग्रस्त शेतकऱ्यांनी आंदोलन करत शासनाच्या निर्णयाचा निषेध केला. हातात करपलेले सोयाबीन पीक घेऊन शेतकऱ्यांनी शासनाने काढलेल्या जीआरची होळी केली. यावेळी राज्य सरकार तसेच स्थानिक आमदार तुषार राठोड यांच्या विरोधात घोषणाबाजी करण्यात आली.
पावसाअभावी आणि प्रतिकूल परिस्थितीमुळे सोयाबीन पिकाचे मोठे नुकसान झाल्याचा दावा आंदोलनकर्त्या शेतकऱ्यांनी केला. मात्र, नुकसान झाल्यानंतरही मुखेड तालुक्याचा दुष्काळी यादीत समावेश करण्यात आलेला नसल्याने शेतकऱ्यांनी प्रश्न उपस्थित केला. बोरगाव येथे झालेल्या आंदोलनात शेतकऱ्यांनी करपलेले सोयाबीन हातात घेत शासनाच्या निर्णयाविरोधात आपला संताप व्यक्त केला.
मुखेड तालुक्यातील अनेक शेतकऱ्यांचे पिकांचे नुकसान झाले असताना तालुका दुष्काळी यादीतून वगळण्याचा निर्णय का घेण्यात आला, असा सवाल शेतकऱ्यांनी उपस्थित केला. नुकसानग्रस्त शेतकऱ्यांना तातडीने आर्थिक मदत मिळावी आणि मुखेड तालुक्याचा दुष्काळी यादीत समावेश करावा, अशी मागणी आंदोलनकर्त्यांनी केली.
दरम्यान, शासनाने या मागणीची तातडीने दखल घेऊन शेतकऱ्यांना दिलासा द्यावा, अशी अपेक्षा व्यक्त होत आहे. मुखेड तालुक्याचा दुष्काळी यादीत समावेश आणि नुकसानग्रस्त शेतकऱ्यांना मदत देण्याबाबत शासनाकडून पुढील निर्णय काय घेतला जातो, याकडे शेतकऱ्यांचे लक्ष लागले आहे.
