अमरावती मनपाच्या स्वच्छता कामगारांचे काम बंद आंदोलन; थकीत वेतन आणि पीएफच्या रकमेवरून संताप
अमरावती : अमरावती महानगरपालिकेच्या स्वच्छता व्यवस्थेसमोर पुन्हा एकदा मोठे आव्हान उभे राहिले आहे. सुरुवातीपासूनच वादात असलेल्या कोणार्क कंपनीच्या स्वच्छता कामगारांनी थकीत वेतन आणि पीएफच्या प्रश्नावरून अखेर काम बंद आंदोलन पुकारले आहे. त्यामुळे शहरातील स्वच्छता व्यवस्थेवरही परिणाम होण्याची शक्यता निर्माण झाली आहे.
स्वच्छता कामगारांचे थकीत वेतन तातडीने अदा करण्यात यावे आणि मागील आठ महिन्यांची पीएफची रक्कम सुरक्षितपणे जमा करण्यात यावी, अशी प्रमुख मागणी कामगारांनी केली आहे. कोणार्क कंपनीकडून वेळेवर वेतन मिळत नसल्याचा आरोप कामगारांकडून करण्यात आला आहे.
विशेष म्हणजे, न्यायालयीन निर्णयानंतर कोणार्क कंपनीचा स्वच्छता कंत्राट रद्द झाल्याचे सांगितले जात आहे. त्यामुळे आता कामगारांचे थकीत वेतन कोण देणार आणि पुढील काळातील वेतनाची जबाबदारी नेमकी कोणाची, असा प्रश्न कामगारांसमोर निर्माण झाला आहे.
दरम्यान, रुक्मिणी नगर परिसरातील कोणार्क कंपनीच्या कार्यालयात कामगारांनी धाव घेतली. मात्र कार्यालयात जबाबदार व्यवस्थापक किंवा मॅनेजर उपस्थित नसल्याचे कामगारांचे म्हणणे आहे. व्यवस्थापक आणि मॅनेजर मुंबईला असल्याचे कार्यालयातील कर्मचाऱ्यांकडून सांगण्यात आल्याची माहिती कामगारांनी दिली.
वेतन वेळेवर मिळत नसल्याने महिला स्वच्छता कामगारांनाही मोठ्या आर्थिक अडचणींचा सामना करावा लागत असल्याचे त्यांनी सांगितले. घरभाडे, कुटुंबाचा दैनंदिन खर्च आणि इतर गरजा भागवताना वेतन रखडल्यामुळे परिस्थिती कठीण झाल्याचे कामगारांचे म्हणणे आहे.
थकीत वेतन आणि पीएफच्या रकमेबाबत ठोस तोडगा न निघाल्याने कामगारांनी काम बंद आंदोलनाचा मार्ग स्वीकारला आहे. आता कामगार जिल्हाधिकारी कार्यालयात जाऊन पालकमंत्र्यांना निवेदन देणार असल्याची माहिती आहे.
एकीकडे कामगारांच्या वेतन आणि पीएफचा प्रश्न गंभीर बनला आहे, तर दुसरीकडे स्वच्छता कामगारांच्या काम बंद आंदोलनामुळे अमरावती शहरातील स्वच्छता व्यवस्थेवर परिणाम होण्याची शक्यता आहे. त्यामुळे प्रशासनाने कामगारांच्या थकीत रकमेचा प्रश्न तातडीने सोडवून पुढील वेतनाची जबाबदारी स्पष्ट करावी, अशी मागणी जोर धरत आहे.
आता प्रशासन आणि संबंधित कंपनी यावर काय भूमिका घेतात आणि स्वच्छता कामगारांच्या थकीत वेतन व पीएफचा प्रश्न कसा मार्गी लावला जातो, याकडे सर्वांचे लक्ष लागले आहे.
