कळमना पोलिसांची मोठी कारवाई; चार चोरीचे गुन्हे उघडकीस
तीन आरोपींसह एका विधीसंघर्षित बालकाला ताब्यात; १.२६ लाखांचा मुद्देमाल जप्त
नागपूर शहरातील कळमना पोलीस ठाण्याच्या गुन्हे शोध (डीबी) पथकाने चोरी आणि वाहनचोरीच्या घटनांचा यशस्वी छडा लावत मोठी कारवाई केली आहे. या कारवाईत तीन आरोपींसह एका विधीसंघर्षित बालकाला ताब्यात घेण्यात आले असून, चार चोरीचे गुन्हे उघडकीस आले आहेत. आरोपींकडून १ लाख २६ हजार ५०० रुपयांचा मुद्देमाल जप्त करण्यात आला आहे.
कळमना परिसरात सातत्याने घडणाऱ्या चोरी आणि वाहनचोरीच्या घटनांचा तपास सुरू असताना डीबी पथकाने सीसीटीव्ही फुटेज आणि गुप्त बातमीदारांकडून मिळालेल्या माहितीच्या आधारे संशयितांचा शोध घेतला. तपासादरम्यान अभिषेक मुकेश मालवी, लखन उर्फ मिलन नत्थूलाल सोळंकी आणि आयुष उर्फ गोमती दिनेश मोगली दिनेश वर्मा या तीन आरोपींसह एका विधीसंघर्षित बालकाचा सहभाग समोर आला.
ही कारवाई डीबी पथकप्रमुख गजानन राऊत यांच्या नेतृत्वाखाली पोलीस कर्मचारी प्रमोद कंगाले, विशाल भटसारे, नितीन मिश्रा, ललित शेंडे, अविनाश गोलवंशे आणि रोशन निंबरते यांच्या पथकाने केली.
पोलिसांनी आरोपींकडून चोरीचा ऐवज तसेच चोरीच्या दुचाकी जप्त केल्या. या कारवाईमुळे कळमना पोलीस ठाण्यात दाखल असलेले चार चोरीचे गुन्हे उघडकीस आले असून, जप्त करण्यात आलेल्या मुद्देमालाची एकूण किंमत १ लाख २६ हजार ५०० रुपये असल्याची माहिती पोलिसांनी दिली.
सीसीटीव्ही फुटेज आणि गुप्त माहितीच्या आधारे कळमना पोलिसांनी केलेल्या या कारवाईमुळे चार चोरीच्या गुन्ह्यांचा छडा लागला असून, जप्त करण्यात आलेल्या मुद्देमालामुळे पुढील तपासाला महत्त्वाची दिशा मिळाली आहे.
