मुलांमध्ये पियुष मसाने, तर मुलींमध्ये वैष्णवी वानखडे प्रथम; राज्यस्तरीय स्पर्धेसाठी विजेत्यांची निवड
अमरावती | प्रतिनिधी
आंतरराष्ट्रीय युवा पंधरवड्याच्या निमित्ताने अमरावतीत जिल्हास्तरीय ‘रेड रन’ स्पर्धेचे आयोजन करण्यात आले. जिल्हा एड्स प्रतिबंध व नियंत्रण कक्ष, जिल्हा सामान्य रुग्णालय अमरावती, आर.डी.आय.के. महाविद्यालय बडनेरा आणि राष्ट्रीय सेवा योजना, संत गाडगेबाबा अमरावती विद्यापीठ यांच्या संयुक्त विद्यमाने ही स्पर्धा घेण्यात आली.
जिल्हा शल्यचिकित्सक डॉ. विनोद पवार यांच्या मार्गदर्शनाखाली आयोजित करण्यात आलेल्या या स्पर्धेला जिल्ह्यातील विविध महाविद्यालयांमधील रेड रिबन क्लबचे सदस्य तसेच इतर विद्यार्थ्यांचा उत्स्फूर्त सहभाग मिळाला.
मान्यवरांच्या उपस्थितीत स्पर्धेला सुरुवात
स्पर्धेची सुरुवात जिल्हा शल्यचिकित्सक डॉ. विनोद पवार, आर.डी.आय.के. महाविद्यालयाचे प्राचार्य डॉ. देशमुख, डॉ. प्रो. अतुल पाटील, जिल्हा कार्यक्रम अधिकारी अजय साखरे, प्रा. नकुल देशमुख, प्रा. प्रीती देशमुख आणि जिल्हा पर्यवेक्षक प्रकाश शेगोकार यांच्या उपस्थितीत हिरवा झेंडा दाखवून करण्यात आली.
यावेळी डॉ. विनोद पवार यांनी एचआयव्ही संसर्गाबाबत जनजागृती करण्यात युवकांची भूमिका अत्यंत महत्त्वाची असल्याचे सांगितले. युवकांनी या जनजागृती अभियानात सक्रिय सहभाग घ्यावा, असे आवाहन करत त्यांनी राज्यस्तरीय स्पर्धेसाठी निवड झालेल्या विद्यार्थ्यांना शुभेच्छा दिल्या.
स्पर्धेचे नियम, मार्ग आणि आवश्यक मार्गदर्शन प्रा. अतुल पाटील यांनी केले.
पियुष मसाने आणि वैष्णवी वानखडे अव्वल
जिल्हास्तरीय रेड रन स्पर्धेच्या पुरुष गटात पियुष मसाने यांनी प्रथम क्रमांक पटकावला. ते श्यामा प्रसाद मुखर्जी महाविद्यालय, शेंदुरजना घाटचे विद्यार्थी आहेत.
पुरुष गटात प्रज्वल हटले यांनी द्वितीय, तर शंकर नांदे यांनी तृतीय क्रमांक मिळवला.
महिला गटात वैष्णवी वानखडे यांनी प्रथम क्रमांक पटकावला. त्या आर.डी.आय.के. महाविद्यालय, बडनेरा येथील विद्यार्थिनी आहेत.
महिला गटात मीनाक्षी खारपाटे यांनी द्वितीय, तर निशा जगताप यांनी तृतीय क्रमांक मिळवला.
या स्पर्धेतील प्रथम आणि द्वितीय क्रमांकाच्या विजेत्यांची याच महिन्यात होणाऱ्या राज्यस्तरीय स्पर्धेसाठी निवड करण्यात आली असून, ते अमरावती जिल्ह्याचे प्रतिनिधित्व करणार आहेत.
पंच आणि आयोजकांचे योगदान
स्पर्धेच्या यशस्वी आयोजनात पंच म्हणून ललित गावंडे, हर्षद भाभूळकर, रसिक वऱ्हाडे, सायली उपरे, संजय थोरात, संजय पटेल, छगन बोंबले, सार्थक धोमणे आणि हर्षद दलाल यांनी महत्त्वाची भूमिका बजावली.
कार्यक्रमाचे संचालन समुपदेशक अजय खेडकर यांनी केले.
एचआयव्ही जनजागृतीसाठी कार्यरत समर्पण ट्रस्ट, राष्ट्रसंत तुकडोजी महाराज शिक्षण व आरोग्य मंडळ मोझरी, श्री शिवाजी शिक्षण संस्था अमरावती, भाग्योदय शिक्षण व बहुउद्देशीय संस्था अमरावती आणि श्री सत्यदेव बाबा महिला मंडळ मोझरी यांनीही स्पर्धेच्या यशस्वी आयोजनासाठी सहकार्य केले.
विविध अधिकारी, कर्मचारी, शिक्षक आणि स्वयंसेवकांनी घेतलेल्या अथक परिश्रमामुळे जिल्हास्तरीय रेड रन स्पर्धा यशस्वीपणे पार पडली. युवकांमध्ये आरोग्य, क्रीडा आणि एचआयव्हीविषयी जनजागृती निर्माण करण्याच्या उद्देशाने आयोजित करण्यात आलेली ही स्पर्धा महत्त्वपूर्ण ठरली.
