अमरावतीत स्वच्छतेचा बोजवारा; सरकारी कार्यालयांजवळच कचऱ्याचे ढीग, नागरिक संतप्त

घंटागाड्यांचा निश्चित वेळ नाही, सफाई कर्मचाऱ्यांची कमतरता; महापालिकेच्या आरोग्य विभागावर गंभीर प्रश्नचिन्ह

अमरावती | प्रतिनिधी

अमरावती शहर स्मार्ट सिटीच्या दिशेने वाटचाल करत असल्याचा दावा केला जात असला, तरी प्रत्यक्षात शहरातील स्वच्छता व्यवस्थेची दयनीय अवस्था समोर येत आहे. शहरातील अनेक भागांमध्ये कचऱ्याचे ढीग साचले असून वेळेवर साफसफाई होत नसल्याने नागरिकांमध्ये तीव्र नाराजीचे वातावरण निर्माण झाले आहे.

नागरिकांच्या म्हणण्यानुसार, शहरातील अनेक भागांत घंटागाड्या नियमितपणे येत नाहीत. कचरा संकलनासाठी कोणताही निश्चित वेळ नसल्याने नागरिकांना मोठ्या अडचणींचा सामना करावा लागत आहे. अनेक ठिकाणी दिवसन्‌दिवस कचरा उचलला जात नसल्याने अस्वच्छतेची समस्या गंभीर बनली आहे.

शहरातील निवासी भाग, मुख्य रस्ते, चौक आणि सार्वजनिक ठिकाणी कचऱ्याचे ढीग साचलेले दिसून येत आहेत. महापालिकेच्या आरोग्य विभागाकडे वारंवार तक्रारी करूनही परिस्थितीत कोणताही ठोस बदल होत नसल्याचा आरोप नागरिकांनी केला आहे.

अपुऱ्या सफाई कर्मचाऱ्यांमुळे आणि नियोजनाच्या अभावामुळे स्वच्छता व्यवस्था कोलमडल्याचे चित्र दिसत आहे. विशेष म्हणजे जिल्हाधिकारी कार्यालय, लाचलुचपत प्रतिबंधक विभाग (एसीबी) आणि इतर महत्त्वाच्या शासकीय कार्यालयांच्या परिसरातही कचऱ्याचे ढीग साचलेले आढळत आहेत.

या भागात दररोज हजारो नागरिक, अधिकारी आणि कर्मचारी ये-जा करतात. तरीही स्वच्छतेकडे दुर्लक्ष होत असल्याने प्रशासनाच्या कार्यक्षमतेवर प्रश्न उपस्थित केले जात आहेत. विशेष बाब म्हणजे या परिसरापासून काही अंतरावरच महापालिका आयुक्तांचे शासकीय निवासस्थान आहे. तरीही परिस्थितीत सुधारणा होत नसल्याने नागरिक संताप व्यक्त करत आहेत.

कचऱ्यामुळे परिसरात दुर्गंधी पसरत असून डासांचे प्रमाण वाढण्याची शक्यता निर्माण झाली आहे. पावसाळ्याच्या पार्श्वभूमीवर साथीचे आजार पसरण्याचा धोका वाढला असल्याची भीतीही नागरिक व्यक्त करत आहेत.

नगरसेवक, लोकप्रतिनिधी आणि संबंधित अधिकाऱ्यांनी प्रत्यक्ष परिस्थितीची पाहणी करून तातडीने उपाययोजना कराव्यात, अशी मागणी नागरिकांकडून होत आहे. स्वच्छ अमरावतीचे स्वप्न साकार करायचे असेल, तर महापालिकेच्या आरोग्य विभागाने अधिक जबाबदारीने आणि प्रभावीपणे काम करणे आवश्यक असल्याचे मत व्यक्त केले जात आहे.

वाढती घाण ठरणार मोठे आव्हान

अमरावती शहरातील स्वच्छतेची सद्यस्थिती ही प्रशासनासाठी चिंतेचा विषय बनली आहे. सरकारी कार्यालयांच्या परिसरातच जर कचऱ्याचे ढीग दिसत असतील, तर इतर भागांतील परिस्थिती किती गंभीर असेल याचा अंदाज सहज लावता येतो. आता महापालिका प्रशासन आणि संबंधित विभाग या समस्येवर किती गांभीर्याने उपाययोजना करतात, याकडे नागरिकांचे लक्ष लागले आहे.