धारणीत विशेष संक्षिप्त पुनरिक्षण जनजागृती अभियानाला उत्स्फूर्त प्रतिसाद; शहरातून भव्य रॅली

तहसीलदार प्रदीप शेवाळे यांच्या नेतृत्वाखाली महसूल, पोलीस, शिक्षक, विद्यार्थी व कर्मचाऱ्यांचा सहभाग; मतदार नोंदणीबाबत जनजागृती

धारणी (जि. अमरावती) | प्रतिनिधी

धारणी शहरात विशेष संक्षिप्त पुनरिक्षण (Special Intensive Revision – SIR) अभियानांतर्गत मतदार जनजागृतीसाठी भव्य रॅलीचे आयोजन करण्यात आले. तहसीलदार प्रदीप शेवाळे यांच्या नेतृत्वाखाली आयोजित या अभियानात महसूल विभाग, पोलीस प्रशासन, शिक्षक, शिक्षिका, विद्यार्थी तसेच विविध शासकीय विभागांतील शेकडो कर्मचाऱ्यांनी उत्स्फूर्त सहभाग नोंदवला.

शहरातील प्रमुख मार्गांवरून काढण्यात आलेल्या या जनजागृती रॅलीद्वारे नागरिकांना मतदार यादीतील नावांची पडताळणी, आवश्यक दुरुस्ती आणि पात्र नागरिकांनी मतदार म्हणून नावनोंदणी करण्याचे आवाहन करण्यात आले. लोकशाही प्रक्रियेत प्रत्येक पात्र नागरिकाचा सहभाग सुनिश्चित करण्यासाठी हे अभियान राबविण्यात आले.

रॅलीत सहभागी विद्यार्थी आणि कर्मचाऱ्यांनी मतदार जागृतीपर घोषणा देत नागरिकांना मतदार यादी अद्ययावत ठेवण्याचे महत्त्व पटवून दिले. विविध जनजागृती फलक आणि संदेशांच्या माध्यमातून मतदानाचा अधिकार आणि मतदार नोंदणीची आवश्यकता याबाबत माहिती देण्यात आली.

या अभियानाला नागरिकांनीही उत्स्फूर्त प्रतिसाद दिला. अधिकृत नावनोंदणी प्रक्रियेत सहभागी होण्याचे तसेच मतदार यादीतील माहिती वेळेवर अद्ययावत करण्याचे आवाहन प्रशासनाने यावेळी केले. लोकशाही अधिक सक्षम करण्यासाठी प्रत्येक पात्र नागरिकाचे नाव मतदार यादीत असणे आवश्यक असल्याचे प्रशासनाने स्पष्ट केले.

प्रशासनाच्या या उपक्रमामुळे मतदार नोंदणीबाबत नागरिकांमध्ये जनजागृती निर्माण होण्यास मोठी मदत होणार असल्याचा विश्वास व्यक्त करण्यात आला. विशेष संक्षिप्त पुनरिक्षण अभियानाच्या माध्यमातून अधिकाधिक पात्र नागरिकांना मतदार यादीत समाविष्ट करण्यासाठी पुढील काळातही विविध जनजागृती उपक्रम राबविण्यात येणार असल्याचे प्रशासनाने सांगितले.