नागपुरात वाहनचोरांवर गुन्हे शाखेचा प्रहार; दोन गुन्हे उघड, चोरीच्या दुचाकींसह आरोपी अटकेत
नागपूर शहरात वाहनचोरीच्या वाढत्या घटनांवर गुन्हे शाखेने मोठी कारवाई करत दोन गुन्ह्यांचा छडा लावला आहे. गुन्हे शाखा युनिट क्रमांक 02 ने प्रतापनगर आणि सिताबर्डी पोलीस ठाण्याच्या हद्दीत घडलेल्या वाहनचोरीच्या दोन प्रकरणांचा उलगडा करत आरोपीला अटक केली आहे.
मिळालेल्या माहितीनुसार, वाहनचोरी प्रकरणातील तपासादरम्यान गुन्हे शाखेला गुप्त माहिती मिळाली होती. त्यानुसार पोलिसांनी सापळा रचत प्रशांत रमेश जोंधळे याला ताब्यात घेतले.
चौकशीदरम्यान आरोपीने वाहनचोरी केल्याची कबुली दिली. त्यानंतर पोलिसांनी आरोपीकडून चोरीस गेलेल्या दोन दुचाकी जप्त केल्या. यामध्ये Honda Shine आणि TVS Raider या दोन दुचाकींचा समावेश आहे.
जप्त करण्यात आलेल्या या दोन्ही दुचाकींची एकूण किंमत सुमारे 1 लाख 60 हजार रुपये असल्याचे पोलिसांनी सांगितले. आरोपीची वैद्यकीय तपासणी करून त्याला पुढील कायदेशीर कारवाईसाठी पोलिसांच्या ताब्यात देण्यात आले आहे.
या कारवाईमुळे नागपूर शहरातील वाहनचोरीच्या दोन मोठ्या प्रकरणांचा उलगडा झाला असून वाहनचोरांविरोधात पोलिसांनी कडक भूमिका घेतल्याचे पुन्हा स्पष्ट झाले आहे. शहरात वाहनचोरीसारख्या गुन्ह्यांवर आगामी काळातही कठोर कारवाई सुरू राहणार असल्याचा स्पष्ट इशारा पोलिसांनी दिला आहे.
