मानोऱ्यात मंदिरात चोरीचा धक्का; दानपेट्या फोडून रक्कम लंपास, घटना CCTV मध्ये कैद
वाशिम जिल्ह्यातील मानोरा शहरात मंदिरात चोरीची धक्कादायक घटना समोर आली आहे. अरुणावती नदीच्या तीरावर असलेल्या श्री गणेश मंदिर आणि शिव मंदिरातील दानपेट्या फोडून अज्ञात चोरट्यांनी रोख रक्कम लंपास केली. विशेष म्हणजे ही संपूर्ण घटना सीसीटीव्ही कॅमेऱ्यात कैद झाली असून पोलिसांनी तपासाला वेग दिला आहे.
मानोरा शहरातील अरुणावती नदी किनाऱ्यावर वसलेले श्री गणेश मंदिर आणि शिव मंदिर हे परिसरातील भाविकांचे श्रद्धास्थान मानले जाते. मात्र, रात्रीच्या सुमारास चोरट्यांनी मंदिरात प्रवेश करत दानपेट्या फोडल्या आणि त्यातील रोख रक्कम चोरून नेली. या प्रकारामुळे भाविकांमध्ये संताप व्यक्त होत आहे.
मंदिर परिसरात लावण्यात आलेल्या सीसीटीव्ही कॅमेऱ्यात चोरट्यांची हालचाल स्पष्टपणे दिसून येत आहे. फुटेजनुसार, चोरी अत्यंत नियोजनपूर्वक करण्यात आल्याचे प्राथमिक तपासात समोर आले आहे. घटनेची माहिती मिळताच मानोरा पोलिस घटनास्थळी दाखल झाले. पंचनामा करून पुढील तपास सुरू करण्यात आला आहे.
सीसीटीव्ही फुटेजच्या आधारे आरोपींचा शोध घेतला जात असून, लवकरच त्यांना अटक करण्यात येईल, असा विश्वास पोलिसांनी व्यक्त केला आहे. दरम्यान, शहरात वाढत्या चोरीच्या घटनांमुळे नागरिकांमध्ये भीतीचे वातावरण निर्माण झाले आहे. रात्रीच्या वेळी पोलिसांनी गस्त वाढवावी, अशी मागणी स्थानिकांकडून करण्यात येत आहे.
मंदिरासारख्या पवित्र ठिकाणी चोरीची घटना घडल्याने नागरिकांमध्ये तीव्र नाराजी व्यक्त होत आहे. आता या प्रकरणाचा उलगडा किती लवकर होतो, याकडे सर्वांचे लक्ष लागले आहे.
