अमरावतीत आयपीएल क्रिकेट सट्ट्यावर गुन्हे शाखेची धाड; तिघांना रंगेहात अटक
अमरावती शहरात सुरू असलेल्या अवैध ऑनलाईन क्रिकेट सट्ट्यावर गुन्हे शाखेने मोठी कारवाई केली आहे. आयपीएल सामन्यावर सुरू असलेल्या सट्ट्याचा पर्दाफाश करत पोलिसांनी चालक-मालकासह तिघांना रंगेहात ताब्यात घेतले असून, सुमारे ५ लाख ६० हजार रुपयांचा मुद्देमाल जप्त करण्यात आला आहे.
अमरावतीचे पोलीस आयुक्त यांनी नुकतीच गुन्हे शाखेची विशेष बैठक घेऊन शहरातील क्रिकेट सट्ट्यावर कठोर कारवाई करण्याचे आदेश दिले होते. त्यानुसार, गुन्हे शाखेचे पोलीस निरीक्षक संदीप चव्हाण यांच्या नेतृत्वाखालील पथकाने गुप्त माहितीच्या आधारे ही कारवाई केली.
२० एप्रिल २०२६ रोजी पोलिसांना खात्रीलायक माहिती मिळाली की, फ्रेजरपुरा पोलीस ठाण्याच्या हद्दीतील राजुरा ग्राम येथील एका घरामध्ये महेश सुरेश पाटकर हा इसम इतर काही साथीदारांसह गुजरात टायटन्स विरुद्ध मुंबई इंडियन्स या आयपीएल सामन्यावर ऑनलाईन सट्टा चालवत आहे. आरोपी मोबाईल फोन आणि बेटिंग ॲपच्या माध्यमातून पैशांची हार-जीत लावत असल्याची माहिती मिळाल्यानंतर पोलिसांनी तातडीने सापळा रचला.
गुन्हे शाखेच्या पथकाने पंचांसह संबंधित ठिकाणी छापा टाकला. धाडीदरम्यान, तिघेही आरोपी मोबाईल आणि लॅपटॉपच्या साहाय्याने क्रिकेट सट्ट्याचे व्यवहार करताना आढळून आले. आरोपी मोबाईल ॲपद्वारे व्यवहार करत होते आणि त्याची नोंद रजिस्टरमध्ये करत असल्याचे पोलिसांनी सांगितले.
पोलिसांनी आरोपींकडील मोबाईल आणि लॅपटॉपची तपासणी केली असता, त्यामध्ये क्रिकेट बेटिंगचे व्यवहार, पैशांच्या नोंदी आणि ऑनलाईन सट्ट्याचे रेकॉर्ड आढळून आले. ‘FINE EXCH’ नावाच्या अवैध बेटिंग ॲपच्या माध्यमातून हे व्यवहार सुरू असल्याचे तपासात स्पष्ट झाले.
या कारवाईत पोलिसांनी एकूण ५ लाख ६० हजार रुपयांचा मुद्देमाल जप्त केला आहे. यात ३ लाख ६० हजार रुपये किमतीचे ९ मोबाईल फोन, २ लाख रुपये किमतीचे २ लॅपटॉप, तसेच सट्ट्याच्या हिशोबाचे रजिस्टर आणि अन्य साहित्याचा समावेश आहे.
या प्रकरणी संबंधित आरोपींविरुद्ध गुन्हा दाखल करण्यात आला असून, या सट्ट्यामागील मोठे जाळे उघडकीस येण्याची शक्यता पोलिसांनी व्यक्त केली आहे.
