कोलकाता विमानतळावर मोठा अपघात! पार्किंगमध्ये उभ्या इंडिगो विमानाला कॅटरिंग गाडीची धडक — इंजिनचे गंभीर नुकसान
कोलकाता विमानतळावर मंगळवारी रात्री एक मोठा अपघात घडला असून, पार्किंगमध्ये उभ्या असलेल्या इंडिगोच्या विमानाला कॅटरिंग सर्व्हिसच्या गाडीने जोरदार धडक दिली. या घटनेमुळे विमानाच्या इंजिनचे मोठे नुकसान झाल्याची माहिती समोर आली आहे.
मिळालेल्या माहितीनुसार, रात्री सुमारे ९:३५ वाजता इंडिगोचे एअरबस A320 हे विमान आपल्या निश्चित पार्किंग ठिकाणी उभे होते. याच दरम्यान, एक एसयूव्हीसारखी कॅटरिंग गाडी अचानक त्या परिसरात आली आणि विमानाच्या उजव्या बाजूच्या इंजिनच्या मागील भागावर जाऊन आदळली.
या धडकेत विमानाच्या इंजिनला गंभीर नुकसान झाले असून, विमान काही दिवसांसाठी सेवेतून बाहेर ठेवावे लागू शकते, अशी प्राथमिक माहिती आहे.
घटनेनंतर तात्काळ इंडिगो एअरलाइनचे अभियंते घटनास्थळी दाखल झाले असून त्यांनी नुकसानीचे परीक्षण सुरू केले आहे. दरम्यान, विमानतळ प्रशासनाने या प्रकरणाची चौकशी सुरू केली आहे.
अपघातानंतर संबंधित कॅटरिंग गाडीच्या चालकाला वैद्यकीय तपासणीसाठी पाठवण्यात आले आहे. चालक थकव्यामुळे वाहन चालवत होता की मद्यधुंद अवस्थेत होता, याचा तपास केला जात आहे.
या घटनेमुळे विमानतळावरील सुरक्षा व्यवस्था आणि कार्यपद्धतीवर गंभीर प्रश्नचिन्ह निर्माण झाले असून, अशा घटना टाळण्यासाठी कडक उपाययोजना करण्याची गरज व्यक्त केली जात आहे.
📺 ताज्या घडामोडींसाठी पाहत राहा — सिटी न्यूज
