पुणे जिल्ह्यातील आंबेगाव तालुका येथे बिबट्याची दहशत दिवसेंदिवस वाढत असून आता ती जीवघेणी ठरू लागली आहे. मंचरजवळील चांडोली-लौकी रस्त्यावर घडलेल्या एका धक्कादायक घटनेत दुचाकीवरून घरी जाणाऱ्या दोन तरुणांवर बिबट्याने भीषण हल्ला केला. या हल्ल्यात एक तरुण गंभीर जखमी झाला असून, प्रसंगावधानामुळे दोघांचेही प्राण थोडक्यात वाचले.
मिळालेल्या माहितीनुसार, लौकी गावचे रहिवासी किरण नवनाथ थोरात आणि त्यांचा मित्र पीयूष शंकर थोरात हे रात्रीच्या सुमारास मंचर येथून आपल्या गावाकडे दुचाकीवरून निघाले होते. चांडोली पार केल्यानंतर लौकी रस्त्यावरील पाण्याच्या टाकीजवळ पोहोचताच, उसाच्या दाट शेतात दबा धरून बसलेल्या बिबट्याने अचानक झडप घालत दुचाकीवर हल्ला चढवला.
या अचानक झालेल्या हल्ल्यात किरण थोरात यांच्या हाताला आणि पाठीच्या डाव्या बाजूला बिबट्याच्या नख्यांनी खोल जखमा केल्या. हल्ल्यामुळे दुचाकीचा तोल गेला होता, मात्र किरण यांनी धैर्य दाखवत गाडीवर नियंत्रण मिळवले आणि जोरात आरडाओरडा सुरू केला. त्यामुळे बिबट्या पुन्हा झडप घालण्याआधीच त्यांनी तेथून वेगाने पलायन केले. या थरारक प्रसंगात पीयूष थोरात सुदैवाने बचावला.
घटनेनंतर दोघेही लौकी गावात पोहोचताच ग्रामस्थांना याबाबत माहिती दिली. जखमी किरण थोरात यांना तातडीने मंचर येथील उपजिल्हा रुग्णालयात दाखल करण्यात आले असून त्यांच्यावर उपचार सुरू आहेत.
दरम्यान, वनविभागाचे वनरक्षक संपत तांदळे आणि वनसेवक जालिंदर थोरात यांनी घटनास्थळी भेट देत पाहणी केली. उसाच्या दाट शेतीमुळे या परिसरात बिबट्यांचा वावर वाढला असल्याचे स्पष्ट झाले आहे.
👉 वनविभागाचे आवाहन:
नागरिकांनी विशेषतः रात्रीच्या वेळी एकटे प्रवास टाळावा, सावधगिरी बाळगावी आणि शक्यतो समूहानेच प्रवास करावा, असे आवाहन वनविभागाकडून करण्यात आले आहे.
