कार्तिकमास म्हटलं की गावागावांत भक्तीचा माहोल निर्माण होतो, आणि सावंगा बुजरुक गाव त्याला अपवाद नाही. दरवर्षीप्रमाणे यावर्षीही रोज सकाळी पहाटे 5 वाजता हनुमान मंदिरात काकडा आरतीचे आयोजन करण्यात येत होते. शेकडो वर्षांपासून चालत आलेली ही परंपरा आजही गावातील चिमुकल्यांपासून ते वृद्धांपर्यंत सर्वजण मनापासून पाळतात. महिनाभर चाललेल्या या आरतीदरम्यान गावातील नागरिक दररोज पहाटे पूजा-अर्चा करून दिंडी स्वरूपात गावाभोवती प्रदक्षिणा करत असतात. या दरम्यान विविध धार्मिक कार्यक्रम आणि भजन संध्या यांचेही आयोजन करण्यात आले होते. लहान मुलांना या परंपरेचे महत्त्व पटवून देण्यासाठी त्यांना विशेष धार्मिक शिक्षणाचे धडेही दिले गेले. सोमवार 4 नोव्हेंबर, मंगळवार रोजी या काकडा आरती व दिंडीची समाप्ती करण्यात आली. या निमित्ताने हनुमान मंदिर परिसरात भव्य महाप्रसादाचे आयोजन करण्यात आले. संपूर्ण गाव या सोहळ्यात सहभागी झालं आणि वातावरणात भक्ती, प्रेम आणि एकतेचा सुगंध दरवळला.
