लातूर जिल्ह्यातील अहमदपूर तालुक्यातील रुद्धा गावात शनिवारी सकाळी एक दुर्दैवी आणि संशयास्पद घटना घडली. गावाबाहेरील शेतातील एका झोपडीजवळ एका वडिलांचा आणि मुलाचा मृतदेह आढळून आला. या घटनेमुळे रुद्धा गावात भीती आणि खळबळ पसरली आहे.
गावकऱ्यांनी घटनास्थळी धाव घेतली आणि पोलिसांना तात्काळ माहिती देण्यात आली. पोलिसांनी घटनास्थळाला भेट देत पंचनामा केला असून फॉरेन्सिक तज्ञांना तपासासाठी बोलावण्यात आले आहे. दोघांच्या मृतदेहांवर झालेल्या जखमांमुळे हा नैसर्गिक मृत्यू नसून खून असल्याचा संशय व्यक्त केला जात आहे. अहमदपूर पोलिस ठाण्याचे अधिकारी आणि पथक सध्या तपासात गुंतले आहेत. पोलीस सूत्रांच्या माहितीनुसार, मृतांची ओळख पटविण्याचं आणि मृत्यूचं कारण शोधण्याचं काम सुरू आहे. शवविच्छेदन अहवाल आल्यानंतरच खऱ्या घटनेचा उलगडा होणार आहे.
